DÇ-2026-da həm meydandakı parlaq oyunu, həm də meydandankənar qalmaqallarla (o cümlədən Donald Trampla bağlı məsələlərlə) yadda qalan “Monako”nun və ABŞ millisinin hücumçusu Folarin Baloqun yay transfer pəncərəsinin bağlanmasına cəmi 10 gün qalmış Avropanın aparıcı klublarının hədəfinə çevrilib.

L’Equipe nəşrinin məlumatına görə, təxminən 60 milyon avro qiymətində dəyərləndirilən 25 yaşlı forvard uğrunda mübarizəyə “Tottenhem”lə yanaşı, İspaniya nəhəngi “Barselona” və İngiltərənin “Aston Villa” klubları da qoşulub. London təmsilçisi “Monako” ilə artıq danışıqlara başlasa da, artan rəqabət vəziyyəti dəyişib.

Baloqun arxada qalan mövsümdə knyazlıq təmsilçisinin heyətində bütün turnirlərdə çıxış etdiyi 43 matçda 19 qol və 5 məhsuldar ötürmə ilə yadda qalıb. DÇ-2026-dakı uğurlu çıxışından sonra o, transfer bazarının ən çox tələb olunan oyunçularından birinə çevrilib. Maqnes Akliuşun PSJ-yə gedişindən sonra “Monako” rəhbərliyi, tələb olunan məbləğ ödənildiyi təqdirdə daha bir ulduzunu satmağa hazır olduğunu nümayiş etdirir.

Namizəd klubların hücumçu axtarışlarındakı mövcud vəziyyəti isə fərqlidir. Kataloniya təmsilçisi əvvəlcə “Atletiko”dan Xulian Alvaresi hədəfləsə də, Madrid klubunun onu birbaşa rəqibinə satmaqdan qəti şəkildə imtina etməsi planları pozub. Robert Levandovski və Ferran Torreslə yollarını ayıran “Barsa” üçün Baloqun hazırda ən ideal variantlardan biri hesab olunur.

“Aston Villa”nın əsas qoleadoru Olli Uotkinsin Səudiyyə Ərəbistanının “Əl-Hilal” klubuna mümkün transferi fonunda amerikalı hücumçunu heyətinə qatmaqla yaranacaq boşluğu doldurmaq istəyir.

Danışıqlarda ilk addımı atan “Tottenhem” isə hücum xəttini gücləndirmək üçün gərgin mübarizədən qalib ayrılmağa çalışır. Baloqunun gələcək karyerası və inkişafı üçün İspaniya La Liqası, yoxsa İngiltərə Premyer Liqası daha uğurlu seçim olar? Bunu zaman göstərəcək.