İspaniya millisi ilə DÇ-2026-nın qalibi və turnirin ən yaxşı futbolçusu seçilən Rodri “Barselona”ya transferini tamamlamaq üçün Kataloniyaya gəlib. “Mançester Siti”nin 30 yaşlı dayaq yarımmüdafiəçisinin çərşənbə axşamı tibbi müayinədən keçdikdən sonra Kataloniya klubu ilə 2030-cu ilə qədər müqavilə imzalayacağı gözlənilir. “AP” agentliyinin məlumatına görə, “Barselona” bu keçid üçün 76,5 milyon avro ödəyəcək.

Bazar ertəsi Barselonaya çatan 2024-cü il “Qızıl top” mükafatçısı keçidi ilə bağlı təəssüratlarını bölüşüb: “«Barselona»da oynamaq uşaqlıq arzum idi. Son günlər gərgin keçsə də, hər şeyin yoluna düşməsinə şadam. Bəzilərini millidən yaxşı tanıdığım komanda yoldaşlarımla tezliklə görüşmək üçün səbirsizlənirəm. İndi işə başlamaq vaxtıdır”.

“Mançester Siti” ilə 4 dəfə Premyer Liqanın və Çempionlar Liqasının qalibi olan təcrübəli oyunçu yeni klubunda Lamine Yamal, Dani Olmo, Pau Kubarsi, Qavi və Pedri kimi milli komandadan tanıdığı futbolçularla birgə çıxış edəcək.

Son mövsümlərdə zədələrdən əziyyət çəkən ispaniyalı ulduz 2024/25 mövsümünün böyük hissəsini xaçvari bağların qırılması səbəbindən buraxmışdı. Dünya çempionatından sonra belindən kiçik əməliyyat olunan Rodri hazırda bərpa prosesi keçir. O, “Siti”nin İngiltərə Superkubokunda “Arsenal”a 0:3 hesabı ilə məğlub olduğu qarşılaşmanı da bu səbəbdən kənardan izləyib.

“Barselona” cari transfer pəncərəsində ingiltərəli Entoni Qordonu heyətinə qatdığı halda, Robert Levandovski və Ferran Torres kimi ulduzlarla yollarını ayırıb.