Braziliyalı ulduz Vinisius Juniorun “Real”dakı gələcəyi ətrafında müzakirələr davam edir. Son günlər onun “Arsenal”a mümkün transferi ilə bağlı xəbərlər geniş yayılıb. İspaniya nəhənginin yeni baş məşqçisi Joze Mourinyonun isə bu məsələdə qəti mövqe sərgilədiyi bildirilir.

“The Sun” nəşrinin məlumatına görə, portuqaliyalı mütəxəssis 2027-ci ilin yayına qədər müqaviləsi olan Vinisiusu komandasında saxlamaq niyyətindədir. Hətta futbolçu yeni müqaviləyə imza atmasa belə, Mourinyo onunla işləməkdə maraqlıdır.

Sky Sports da xəbər verir ki, “Real” rəhbərliyi Vinisiusu gələcək planlarının əsas hissəsi hesab edir və braziliyalının sonda müqaviləsini uzadacağına inanır. Bununla belə, tərəflər arasında danışıqlar bir neçə aydır davam etsə də, hələlik yekun razılıq əldə olunmayıb.

Mövcud müqaviləyə əsasən, Vinisius 2027-ci ilin yanvarından etibarən digər klublarla danışıqlar aparmaq hüququ qazanacaq və altı ay sonra Madrid klubunu azad agent kimi tərk edə biləcək. Buna baxmayaraq, “Real” onu bu yay satmağı düşünmür.

İngiltərə təmsilçisi “Arsenal”ın isə 25 yaşlı futbolçunu rekord məvaciblə heyətinə cəlb etməyə çalışdığı bildirilir. “The Telegraph” və The Athletic yazır ki, “topçular” braziliyalıya olduqca cəlbedici maliyyə paketi təklif ediblər. “Real” isə buna daha sərfəli yeni müqavilə ilə cavab verib.

Mourinyo ilə Vinisius arasında ötən mövsüm Çempionlar Liqasındakı “Benfika” – “Real” matçından sonra yaşanan gərginlik də yenidən gündəmə gəlib. Həmin vaxt portuqaliyalı mütəxəssis futbolçunun qol sevincini tənqid etmişdi. Lakin İngiltərə mətbuatının iddiasına görə, bu fikir ayrılığı artıq geridə qalıb və Mourinyo Vinisiusu komandanın əsas simalarından biri hesab edərək onun hər vəchlə “Real”da qalmasını istəyir.