Konfrans Liqasının II təsnifat mərhələsində “Zirə” ilə qarşılaşacaq “Paide”nin baş məşqçisi Tarmo Kink, rəqib barədə fikirlərini bölüşüb. Kink “Zirə”nin əvvəlki mərhələdə mübarizədən kənarlaşdırdıqları “Heqelmann”dan tamamilə fərqli bir oyun üslubuna malik olduğunu vurğulasa da, komandasının meydanda ehtiyatlı davranmaq niyyətində olmadığını qeyd edib.

Daxili çempionatda “Harju”ya qarşı alınan 2:5 hesablı ağır məğlubiyyəti şərh edən Kink, artıq bu səhifəni bağlayaraq bütün diqqəti avrokuboklara yönəltdiklərini bildirib: “Həmin oyun üçün heç bir bəhanə yoxdur, məsuliyyəti boynumuza alırıq. Lakin keçmişdə qalmamaq və yeni oyuna fokuslanmaq lazımdır”.

Heyət rotasiyasından razı qalan mütəxəssis, komandada kifayət qədər təcrübəli oyunçuların olduğunu xatırladıb. Qapıçı mövqeyində isə vəziyyət belədir: əsas qolkiper Ebrima Jardju son turda istirahət edib, zədəli Marko Meeriitsin isə bir müddət yaşıl meydanlardan kənarda qalacağı dəqiqləşib. Uzunmüddətli zədəli olan Uilyam Lins və Qerdo Yuxkami istisna olmaqla, komandada hazırda ciddi itki yoxdur.