Mundialın finalı ərəfəsində Nyu-Yorkda təşkil olunan “Fan Festival” tarixi kadrlarla yanaşı, həm də kifayət qədər qəribə məqamlarla yadda qalıb. Hudzon çayı sahilindəki nəhəng məkanda keçirilən və biletləri 160 dollara başa gələn bu qapalı tədbir dünya idmanının ən parlaq simalarını bir araya gətirib.
Ulduzlar və səs-küylü auditoriya
Lionel Messi, Emiliano Martines, Rodri, Tom Bredi, Novak Cokoviç və Kevin Dürant kimi ulduzların iştirak etdiyi gecə gərgin atmosferlə başlayıb. FİFA prezidenti Canni İnfantinonun iştirak etməməsi və səhnədəki texniki problemlər (pis səs sistemi) auditoriyanın narazılığına səbəb olub. Tribunalardan Messiyə dəstək şüarları eşidilsə də, digər qonaqlar tez-tez fitə basılıb.
Bredi və Messi: “Dil baryeri” və arxiv fotosu
Gecənin ən maraqlı anı Tom Bredinin Messi ilə dialoqu olub. Bredi sualı ingilis dilində verdiyi üçün Messi bir müddət duruxub, yalnız tərcüməçinin müdaxiləsindən sonra sualı anlaya bilib. Lamin Yamalla illər öncə çəkilən məşhur fotoya toxunan argentinalı ulduz deyib: “Həyat möcüzələrlə doludur. Hər ikimizin dünya finalına çatması inanılmazdır. Yamala uğurlar arzulayıram, lakin bazar günü onu dayandırmaq üçün əlimizdən gələni edəcəyik”.
Messinin qəfil gedişi
Tədbirin rəsmi hissəsi bitməmiş, Kevin Dürantın sualları zamanı Messinin səhnədən ayrılmaq üçün kulislərə işarə etməsi diqqətdən qaçmayıb. Ulduz futbolçu proqramın sonuna qədər gözləmədən zaldan çıxıb. Beləliklə, FİFA-nın idman və şou-biznesi birləşdirmək cəhdi olan bu tədbir, böyük ulduzların bir araya gəlməsinə baxmayaraq, təşkilati çatışmazlıqlar və Messinin qəfil gedişi ilə yaddaşlara həkk olundu.