Macarıstanın paytaxtı Budapeştdə güləş üzrə ilin son reytinq turniri davam edir. Yarışın ikinci günündə xalçaya çıxan Azərbaycanın beş təmsilçisindən ikisi adını finala yazdıraraq qızıl medal qazanmaq şansını qoruyub.
79 kq çəki dərəcəsində mübarizə aparan sərbəst güləşçimiz Cəbrayıl Hacıyev ardıcıl olaraq Şamsat Tair (Qazaxıstan, 2:0) və Luka Çxitunidzeni (Gürcüstan, 5:3) üstələyərək həlledici mərhələyə yüksəlib. Onun çempionluq yolundakı rəqibi monqolustanlı Olonbayar Suldxu olacaq. 92 kq-da çıxış edən Əli Tsokayev isə Dastin Qlenn Plott (ABŞ, 3:1), Məhəmməd Şərifov (Bəhreyn, 2:0) və Fatih Altunbaşa (Türkiyə, 11:0) şans tanımayaraq finala vəsiqə qazanıb. Tsokayev qızıl medal üçün ukraynalı Məhəmməd Əliyevlə qarşılaşacaq.
Digər güləşçilərimiz üçün isə bu yarış günü uğursuzluqla yadda qalıb. 97 kq-da çıxış edən Osman Nurməhəmmədov start görüşündə polyak Zbiqnev Baranovskiyə xalların keyfiyyətinə görə (3:3) məğlub olub. Ağır çəkili (125 kq) Giorgi Meşvildişvili Robert Baran (Polşa, 3:1) və Demetrius Tomas üzərində (ABŞ, 6:2) inamlı qələbələr qazansa da, 1/4 finalda çinli Buxirdun Buxirdunla qarşılaşmaya çıxmayıb. Yeganə qadın güləşçimiz Gültəkin Şirinova (55 kq) isə elə ilk mərhələdə ukraynalı Nataliya Klivçutskayaya uduzub (1:5).
Hələlik aktivində medalı olmayan Azərbaycan yığmasının Macarıstandakı reytinq sınaqları iyulun 19-da başa çatacaq.