İsveçrənin Bil şəhərində keçirilən ənənəvi mötəbər şahmat festivalı gərgin mübarizə ilə davam edir. Yarışın ən güclülər qrupunda – “Masters” turnirində ölkəmizi istedadlı qrossmeyster Aydın Süleymanlı təmsil edir.
Nüfuzlu turnirdə təmsilçimizlə yanaşı, dünya şahmatının tanınmış simaları və perspektivli gəncləri mübarizə aparır: Levon Aronyan (ABŞ), Le Quanq Lyem (Vyetnam), Mattias Blübaum (Almaniya), Xose Eduardo Martines Alkantara (Meksika), Yağız Kaan Ərdoğmuş (Türkiyə).
Hazırda festival çərçivəsində klassik şahmat üzrə qarşılaşmalar baş tutur. Yarışın II turunda Aydın Süleymanlı Meksika təmsilçisi Xose Eduardo Martines Alkantara ilə üz-üzə gəlib. Gərgin keçən partiyada tərəflər yenişə bilməyiblər və oyun heç-heçə ilə başa çatıb.
Təmsilçimiz turnirin ilk turunda da dünya şahmatının elitasında yer alan təcrübəli qrossmeyster Levon Aronyanla xalları yarı bölmüşdü. Qeyd edək ki, klassik şahmat marafonundan öncə festival proqramına uyğun olaraq Fişer şahmatı (Şahmat-960) və rapid (sürətli şahmat) üzrə yarışlar keçirilib. Aydın Süleymanlı hər iki kateqoriyada yüksək performans nümayiş etdirərək ikinci yeri tutub və festivala uğurlu start verib.