FİFA-nın Dünya Çempionatındakı rəsmi “Güc Reytinqi” (Power Ranking) hesabatı hər kəsi təəccübləndirib. Qrup mərhələsinin və ümumilikdə turnirin ən yaxşı oyunçusu kimdir? Deniz Undav!
Almaniya millisinin hücumçusu 8.38 xalla Messi, Mbappe, Vinisius Junior, Dembele və Holand kimi dünya ulduzlarını geridə qoyub. Səbəb isə inanılmaz effektivlikdir: Undav turnirdə meydana çıxdığı cəmi 86 dəqiqə ərzində 3 qol və 2 məhsuldar ötürmə ilə yaddan qalıb.
Bu fantastik statistikaya rəğmən, baş məşqçi Yulian Naqelsmann hücumçunu ehtiyat skamyasında saxlamağa davam edir. Hətta qrupdakı sonuncu, formal xarakter daşıyan Ekvador matçında belə, bütün Almaniya futbol ictimaiyyəti Undavın əsas heyətdə başlayacağını gözləyirdi. Lakin Naqelsmann komandanın əsas nüvəsinin ahəngini pozmaq istəmədi.
Baş məşqçi qərarını bu cür əsaslandırıb: “Həmişə debatlar olur: onu ilk dəqiqələrdən meydana buraxıb gücündən yararlanmaq, yoxsa matçın gedişatını dəyişən “böyük qüvvə” kimi ehtiyatda saxlamaq? Biz ikinci yolu seçirik. Düzdür, start heyəti önəmlidir, amma son 20 dəqiqədə meydana çıxıb görüşün taleyi həll edən oyunçuların da rolu əvəzsizdir. Deniz məhz bu xüsusi qrupdadır”.
Görünən odur ki, FİFA onu turnirin ən yaxşısı hesab etsə də, Deniz Undav Bundestimin pley-off mərhələsində də “gizli silahı” və super ehtiyat qüvvəsi olaraq qalacaq.