“Qarabağ” yay transfer pəncərəsində növbəti addımını atıb. Ağdam təmsilçisi dördüncü transferini rəsmiləşdirib. Klubun mətbuat xidmətinin yaydığı məlumata görə, “atlılar” Mozambik millisinin müdafiəçisi Bruno Lanqanı heyətinə qatıb. 28 yaşlı futbolçu ilə 3 illik müqavilə imzalanıb.
Müqavilə ilə İspaniyanın “Almeriya” klubuna məxsus olan Lanqa, ötən mövsümü icarədə keçirib. O, mövsümün ilk yarısında Kiprin “Pafos”, ikinci hissəsində isə Portuqaliyanın “Eştrela” klublarında çıxış edib.
Xatırladaq ki, “Qarabağ” bu yay heyətini daha üç futbolçu – Cəlil Muaddib, Zakariya Savo və Samuel Lobatu ilə gücləndirib. Almaniyanın nüfuzlu Transfermarkt portalının məlumatına görə “Köhlən atlar” Lobatunun keçidi üçün Portuqaliyanın “Portimonense” klubuna 150 min avro təzminat ödəyib və onunla da 3 illik sözləşmə imzalayıb.