Millimizin futbolçusu Toral Bayramov Türkiyənin “Bursaspor” klubuna transfer olunmasının pərdəarxası məqamlarını bölüşüb. 25 yaşlı yarımmüdafiəçi AFFA-nın təşkil etdiyi rəsmi sual-cavab sessiyasında azarkeşlərin marağına səbəb olan sualları cavablandırıb və bu keçidin onun karyerasındakı əhəmiyyətindən danışıb.

Legioner həyatı yaşamağın onun əsas hədəflərindən biri olduğunu gizlətməyən futbolçu seçiminə belə aydınlıq gətirib: “Çoxdandır ki, Azərbaycanı ölkə xaricində təmsil etmək istəyirdim və qarşıma belə bir şans çıxdı. “Bursaspor” böyük tarixi olan, köklü bir klubdur. Onların çılğın azarkeş ordusunu isə hamı yaxşı tanıyır. Bu təklif gələndə qərar verdim ki, artıq karyeramda yeni səhifə açmağın vaxtıdır. Ümid edirəm ki, bu keçid həm mənim, həm də yeni klubum üçün uğurlu olacaq”.