Premyer Liqanın 29-cu turunda səfərdə “Sabah”a 0:2 hesabı ilə məğlub olan “Karvan-Yevlax”ın baş məşqçisi Füzuli Məmmədov qarşılaşmadan sonra media mənsublarının suallarını cavablandırıb. Bakı təmsilçisi ilə oyunu şərh edən mütəxəssis, məğlubiyyətin əsas səbəblərinə toxunub.

Oyunun çətin keçəcəyini öncədən bildiklərini vurğulayan Məmmədov, rəqibin gücünü xüsusi qeyd edib: “Sabah”ın necə güclü komanda olduğu turnir cədvəlindəki mövqeyindən də aydın görünür. Bu matça çox ciddi hazırlaşmışdıq və hədəfimiz ən azı bir xal qazanmaq idi. Təəssüf ki, erkən qırmızı vərəqə oyunun gedişatına ciddi təsir etdi. Belə rəqibə qarşı tam heyətlə oynamaq belə çətindir, on nəfərlə qalmaq isə işimizi daha da mürəkkəbləşdirdi. Azlıqda qaldıqdan sonra meydanda boş zonalar verməyə başladıq. Müdafiə xəttinin və qapıçımızın inamlı çıxışı sayəsində ilk hissədə qapımızı toxunulmaz saxlaya bildik. Lakin fasilədən sonra yol verdiyimiz səhvlər qollarla nəticələndi”.

Komandanın bu mövsümkü cəsarətli futbolundan fərqli olaraq, bu gün daha çox müdafiəyə çəkilməsi ilə bağlı suala baş məşqçi belə aydınlıq gətirib: “Rəqibi dərindən analiz etmişdik. “Sabah”ın ən təhlükəli tərəfi pressinqdir; onlar rəqibi sıxaraq səhvə məcbur edir və qol epizodları yaradırlar. Bizim məqsədimiz onlara bu imkanı verməmək idi. Hesab 0:2 olduqdan sonra rəqib də on nəfərlə qaldı. Lakin biz irəli böyük qüvvə ilə atılsaydıq, əks-hücumda yaxalanma riskimiz çox idi. Bu səbəbdən nizam-intizamı qorumağa və qapalı futbol oynamağa üstünlük verdik”.

Sonda futbolçularına göstərdikləri əzmə görə təşəkkür edən Füzuli Məmmədov, gələcək oyunlara fokuslanacaqlarını bildirib: “Çempionat davam edir. Məğlubiyyətə baxmayaraq, ruhdan düşmürük və sona qədər mübarizə aparacağıq”.