“Neftçi”nin ukraynalı mütəxəssisi Yuri Vernidub “Sumqayıt” üzərindəki inamlı qələbədən sonra mətbuat konfransında həm oyunun analizini verib, həm də şəxsi xatirələrini bölüşüb.

Mətbuat konfransına kədərli bir xatırlatma ilə başlayan Vernidub, bir il öncə baş vermiş faciəni unutmadığını qeyd edib: “Dəqiq xatırlayıramsa, ötən il məhz aprelin 4-də mən ‘Krivbas’da çalışırdım. Həmin gün raket zərbəsinin uşaq meydançasına düşməsi nəticəsində 9-u uşaq olmaqla, 30 nəfər həlak olmuşdu. O gündən bəri bu tarix mənim üçün çox ağır bir xatirədir”.

Matçın gedişatını dəyərləndirən baş məşqçi, futbolçularının nümayiş etdirdiyi performansı yüksək qiymətləndirib: “Bu gün komandamız meydanda əla performans sərgilədi. Çoxsaylı qol epizodları yaratdıq, hesabı daha da böyütmək imkanımız var idi. Buraxılan qoldan sonra futbolçuların göstərdiyi reaksiya və geri dönüş etmək əzmi məni sevindirdi. Aprel ayının bizim üçün çətin keçəcəyini komandaya demişəm. Qarşıda bizi “Qarabağ”, “Zirə” və “Araz–Naxçıvan” kimi güclü rəqiblərlə vacib oyun gözləyir. Bu oyunları səbirsizliklə gözləyirəm, çünki komandamın əsl gücünü məhz bu sınaqlarda görəcəyik“.

Vernidub zədəli və bərpa prosesində olan futbolçular haqqında da məlumat verib. O, kapitan Emin Mahmudovun yoxluğunun hiss olunduğunu vurğulayıb: “Ümid edirəm ki, 1-2 günə Emin məşqlərə qoşulacaq. O, komandanın kapitanıdır və onunla oyunumuz tamamilə fərqli çalarlar qazanır. Hazırda Sambu hələ bizimlə deyil, Abubakar isə tam formasını bərpa etməyib. Buna görə də start heyətdə şans verdiyimiz Varqasın bu gün nümayiş etdirdiyi futbol qənaətbəxş idi”.

Son zamanlar müzakirə mövzusu olan hakimlik qərarlarına toxunan mütəxəssis, təmkinli davranmağa üstünlük verib: “Hakimliyin bizim ziyanımıza olan qərarları da oldu. Lakin unutmayaq ki, hakimlər də insandır və səhv edə bilərlər. Mənim əsas işim hakimləri deyil, komandanı hər oyuna ən yüksək səviyyədə hazırlamaqdır”.