UEFA Konfrans Liqasının 1-ci təsnifat mərhələsinin ilk oyunu çərçivəsində keçirilən “Zirə” – “Torpedo” (Kutaisi, Gürcüstan) qarşılaşması (3:0) ölkə futbolu üçün əlamətdar yubileylərlə yadda qalıb.

Peşəkar Futbol Liqasının (PFL) məlumatına görə, bu görüş klublarımızın avrokuboklar tarixindəki 500-cü matçı olub. Təmsilçilərimiz indiyədək aşağıdakı turnirlərdə mübarizə aparıblar:

Çempionlar Liqası – 120 oyun

Avropa Liqası – 283 oyun

Konfrans Liqası – 63 oyun

Kuboklar Kuboku – 8 oyun

İntertoto Kuboku – 26 oyun

Ümumilikdə keçirilən 500 qarşılaşmada klublarımız 159 qələbə qazanıb, 112 heç-heçə edib və 229 məğlubiyyətlə üzləşiblər.

Bizimkilərin avrokuboklardakı debütü 9 avqust 1994-cü ilə təsadüf edir. Həmin gün “Turan” Türkiyənin “Fənərbaxça” klubunu qəbul edib və 0:5 hesabı ilə məğlub olub.

Kutaisililərlə matç daha bir statistik göstəricisi ilə diqqət çəkib. “Zirə”nin müdafiəçisi Ruan Renatunun vurduğu ilk qol ölkə klublarının avrokuboklar tarixindəki 550-ci yubiley qolu kimi qeydə alınıb.

Texniki nəticələr nəzərə alınmazsa, komandalarımızın toplarla ümumi fərqi 552–759 təşkil edir. Avrokuboklarda ilk qolumuzun müəllifi isə “Kəpəz”in sabiq futbolçusu Yadigar Süleymanovdur (22 avqust 1995-ci il, “Avstriya” ilə səfər oyunu — 1:5).