“Neftçi”nin baş məşqçisi Yuri Vernidub Premyer Liqanın 21-ci turunun təxirə salınmış matçında “Qarabağ” üzərində qazanılan dramatik qələbəni (2:1) şərh edib.

Təcrübəli mütəxəssis ilk növbədə “ağ-qaralar”ın azarkeşlərinə müraciət edərək, bu qələbənin turnir cədvəli və komandanın mənəvi durumu baxımından böyük əhəmiyyət kəsb etdiyini vurğulayıb. Lakin ukraynalı çalışdırıcı qələbəyə rəğmən, rəqibə əvvəlki ağır məğlubiyyəti (1:5) unutmadıqlarını qeyd edib: “Bütün “Neftçi” azarkeşlərini təbrik edirəm. Bizim üçün həyati əhəmiyyətli bir qələbə idi. Eyni zamanda, bir müddət əvvəl aldığımız 1:5 hesablı məğlubiyyətə görə onlardan bir daha üzr istəyirəm. “Neftçi” hər zaman stabil səviyyə nümayiş etdirməli, meydanın hər qarışında pressinq tətbiq etməli olan komandadır. O ağır məğlubiyyətdən düzgün nəticələr çıxardıq və bu gün meydanda fərqli komanda var idi”.

Qələbəyə baxmayaraq, Yuri Vernidub matçın gərginliyinin onun üzərində ciddi iz buraxdığını gizlətməyib. Mətbuat konfransında emosional duruma diqqət çəkən baş məşqçi, media nümayəndələrindən anlayış xahiş edərək sualları cavablandırmaqdan imtina edib: “Bu gün kifayət qədər yaxşı oyun izlədik. Lakin sizdən bir xahişim var: bu gün mənə sual verməyin. Hazırda keçirdiyim hisslər çox fərqlidir. Bu qarşılaşma məni emosional baxımdan o qədər yordu, o qədər sıxdı ki, hazırda danışmağa taqətim yoxdur. Bu, heç bir halda hörmətsizlik deyil – mən hər birinizə böyük rəğbət bəsləyirəm. Sadəcə, bu dəfəlik məni anlayacağınızı ümid edirəm. Qarşıda bizi daha 4 oyun gözləyir, həmin vaxt bütün suallarınızı istədiyiniz qədər cavablandırmağa hazır olacağam”.