Leo Messi DÇ-nin açılış matçında Əlcəzairə qarşı het-trik edərək görüşün qəhrəmanı olsa da, yaşıl meydandan kənarda xoşagəlməz hadisə ilə üzləşib. Ulduz futbolçunun atası Xorxe Messinin səhhətində problemlər yarandığı və həkim nəzarətinə götürüldüyü bildirilib. Mövzu ilə bağlı bəyanat yayan Messi ailəsi şayiə və uydurmaların qarşısını almaq üçün ictimaiyyətdən onların şəxsi həyatına hörmətlə yanaşılmasını xahiş edib.
Bu bəyanat Argentina mediasında, xüsusən də “Luzu TV” telekanalında Xorxe Messinin vəfatı ilə bağlı yayılan yalan xəbərlərə cavab olaraq verilib. Canlı efirdə bu yanlış məlumatı səsləndirən proqramın aparıcısı Florensiya Penya sosial şəbəkə hesabında baş verənlərə görə üzr istəyib: “Messinin ailəsinə yaşatdığımız bu dəhşətli vəziyyətə görə dərin üzrxahlığımı bildirirəm. Səbəb olduğum əzaba görə çox utanıram. Bu yalan məlumat canlı yayım zamanı mənə çəkiliş qrupu tərəfindən ötürüldü və mən də onlara güvəndim. Buna baxmayaraq, baş verən səhvdə məsuliyyətimi anlayıram. Bu səbəbdən “Luzu TV” layihəsindən ayrılmaq qərarına gəldim. Ürəkdən üzr istəyirəm, böyük bir səhv etdim”.
Xatırladaq ki, 68 yaşlı Xorxe Messi uzun illərdir oğlunun agenti kimi fəaliyyət göstərir.