Premyer Liqanın XXXII turunda səfərdə “Karvan-Yevlax”ı 2:1 hesabı ilə məğlub edən “Qəbələ”nin baş məşqçisi Kaxaber Tsxadadze qarşılaşmadan sonra mətbuat konfransında fikirlərini bölüşüb.

Gürcü mütəxəssis turnir baxımından böyük əhəmiyyət kəsb etməməsinə baxmayaraq, komandasının nümayiş etdirdiyi oyundan razı qaldığını bildirib: “Yaxşı oynadıq və kifayət qədər qol epizodları yaratdıq. Sadəcə, ilk hissədə son nöqtəni qoymaqda bir az çətinlik çəkirdik. İkinci hissənin startında qapımızda qol görsək də, sınmadıq və kombinasiyalı futbol oynamağa davam etdik. İki qol vurduq, amma reallıqda daha çox fərqlənə bilərdik. Meydanda çoxlu pozitiv məqamlar gördüm. Turnir cədvəli baxımından bu oyun hər iki komanda üçün heç nəyi dəyişmirdi, lakin buna baxmayaraq, meydanda keyfiyyətli mübarizə getdi. Futbolçularıma təşəkkür edirəm, matça maksimum ciddi yanaşdılar və baxımlı futbol nümayiş etdirdilər”.

O, pley-off mərhələsindəki potensial rəqiblərin analizinə başlayıb-başlamadıqları ilə bağlı suala isə qısaca belə cavab verib: “Hazırda daxildə tam olaraq nə işlər gördüyümüzü açıqlaya bilmərəm, amma həmin qarşılaşmaya çox ciddi hazırlaşırıq. Potensial rəqiblərimizin hamısını diqqətlə izləyirik”.