DÇ-2026-da çempionluq yarışı 8 komanda arasında davam edir. İyulun 19-da kuboku qazanacaq komanda artıq bəllidir. “Opta Analyst” analitik mərkəzinin superkompüteri 1/4 final mərhələsinin iştirakçıları üçün şansları yenidən hesablayıb. Siyahıya Fransa liderlik etsə də, titulu qorumağa çalışan Argentina ilə bağlı proqnozlar gözlənilməz olub.

Analitiklərin qənaətinə görə, turnirin qalibi adına ən yaxın namizəd fransızlardir. Kilian Mbappe və komandasının yarımfinala yüksəlmək şansı 73,9%, finala çıxmaq ehtimalı 44,3%, çempionluğu qazanmaq şansı isə 27,3% kimi dəyərləndirilir. Bu, yarışda qalan komandalar arasında göstərilən ən yüksək nəticədir.

Fransanın ən yaxın izləyicisi İspaniyanın yarımfinal ehtimalı 69,7%, final şansı 36,4%, çempionluq ehtimalı isə 21,3% təşkil edir.

Argentinanın çempionluq şansı Fransadan 10% azdır. Son dünya çempionu Argentina siyahıda 3-cü sıranı qərarlaşıb. “Albiseleste”nin yarımfinala çıxmaq şansı 69,1%, finala yüksəlmək ehtimalı 36,4%, kuboku yenidən qazanmaq şansı isə 17,3% qiymətləndirilir.

İngiltərə milli komandası dördüncü pillədə qərarlaşıb. Superkompüter ingilislərin yarımfinal şansını 62,4%, final ehtimalını 35%, çempionluq göstəricisini isə 16,5% hesablayıb. Qeyd edək ki, bu nəticə Argentinadan cəmi 0,8% azdır və hər iki komanda yarımfinalda üz-üzə gələ bilər.

Superkompüterin hesablamasına görə, əsas favoritlər halqası burada qapanır. 5-ci sırada qərarlaşan Norveçin yarımfinal ehtimalı 37,6%, final şansı 17,1%, çempionluq ehtimalı isə 6,6%-dir.

Siyahının son pillələrində qərarlaşan İsveçrə, Mərakeş və Belçika millilərinin çempionluq şansları isə kifayət qədər aşağı qiymətləndirilir. İsveçrənin yarımfinala yüksəlmək ehtimalı 30,9%, final şansı 11,5%, çempionluq göstəricisi isə cəmi 3,8%-dir. Mərakeş üçün bu göstəricilər müvafiq olaraq 26,1%, 9,6% və 3,7% təşkil edir. Cədvəlin autsayderi olan Belçikanın isə yarımfinala çıxmaq şansı 30,3%, finala adlamaq ehtimalı 9,8%, turnirin qalibi olmaq imkanı isə cəmi 3,6%-dir.