“Sabah”ın baş məşqçisi Valdas Dambrauskas bir həftə əvvəlki start heyətə üstünlük verdiyi halda rəqib ilk oyunla müqayisədə bir dəyişiklilə meydana çıxmışdı. Ötən oyunun qəhrəmanı Rupanov bu dəfə start heyətdə meydana çıxmışdı. “Levski”nin baş məşqçisi Henninq Berqin bu dəyişikliyi oyuna ciddi təsir etməsə də, norveçli mütəxəssis cavab oyununda da taktiki cəhətdən rəqibini üstələyərək istədiyi nəticəni qazandı. “Sabah”ın oyun boyu xaotik, inersiyaya köklənən, qeyri-mütəşəkkil hücumlarını bolqarlar çətinlik çəkmədən dayandırdılar və hər hissədə bir qol vurmaqla “Sabahı” Avropa kuboklarındakı sabahdan məhrum etdilər.

Ümumiyyətlə ötən yazılarımızda da qeyd etmiyimiz kimi “Sabah” öz potensialından qat-qat aşağı oynayır. İstər ötən mövsüm premyer-liqada, istərsə də, bu mövsümün Avropa kuboklarında masazırlılar futbol adına heç bir ciddi irəliləyiş etmədiklərini göstərdilər. Zəif Moldova klubunu yenməklə ümidlərimizi artırsalar da, bu komandanın nə üçün, hansı məqsədlə oynadığı nə meydanda, nə də ondan kənarda məlum deyil. Qalaq-qalaq legionerləri alıb gətirən klub yerlilərlə də o Moldova klubunu keçə bilərdi.  

UEFA Konfrans Liqası

3-cü təsnifat mərhələsi, cavab oyunu

Sabah (Azərbaycan) – Levski (Bolqarıstan)  0:2 (ilk oyun 0:1)

“Sabah”: Pokatilov, Rəhman Daşdəmirov (Kahem Parris, 46), Solvet, Noqeyra, Zedadka, Lepinitsa, Zinədin Uld Xaled (Abdullax Xaybullayev, 63), Letiç, Sekidika (Anatoli Nuriyev, 63), Safranko (Xəyal Əliyev, 78), Coy-Lens Mikels.

“Levski”: Vutsov, Aldayr Neveş, Kristian Dimitrov, Kristian Makun, Maykon, Mitkov, Everton Bala (Rildo Qonsalves, 72), Qasper Trdin, Petkov (Karl Fabian, 72), Rupanov (Mazire Soula, 63), Kirilov (Tsunami, 82).

Qollar: Kirilov, 40 (0:1). Soula, 88 (0:2).