UEFA Konfrans Liqasının pley-off mərhələsində “Qarabağ”la qarşılaşacaq Kiyev “Dinamo”su Ukrayna mətbuatının diqqət mərkəzindədir. “Futbol24” nəşri Azərbaycan çempionu haqqında geniş təhlil dərc edərək Ağdam təmsilçisinin tarixindən, hazırkı heyətindən və güclü tərəflərindən bəhs edib.

Nəşr qeyd edir ki, “Qarabağ” dünya futbolunda özünəməxsus taleyə malik klublardan biridir. 1951-ci ildə “Məhsul” adı ilə yaradılan komanda sonradan “Şəfəq”, “Kooperator”, “Qarabağ” və bir müddət sponsorun adı ilə “Qarabağ-Azərsun” kimi fəaliyyət göstərib. 2004-cü ildən etibarən isə yenidən tarixi adına qayıdıb.

Məqalədə Ağdamın Azərbaycanın mühüm şəhərlərindən biri olduğu, 1993-cü ildə Ermənistanın işğalı nəticəsində klubun doğma stadionundan didərgin düşdüyü vurğulanır. Həmin dövrdə komandanın sabiq baş məşqçisi Allahverdi Bağırovun mina partlayışı nəticəsində həlak olduğu da xatırladılır.

Bütün çətinliklərə baxmayaraq, “Qarabağ” fəaliyyətini dayandırmayıb. Uzun illər ev oyunlarını Bakıda keçirməyə məcbur olan Ağdam təmsilçisi zamanla Azərbaycan futbolunun aparıcı qüvvəsinə çevrilib.

Nəşrin fikrincə, klubun müasir uğurlarının əsas memarı baş məşqçi Qurban Qurbanovdur. O, 2008-ci ildən komandaya rəhbərlik edir və bu müddətdə “Qarabağ”ı ölkə futbolunun dominant klubuna çevirib.

Qurbanovun rəhbərliyi altında Ağdam təmsilçisi 11 dəfə Azərbaycan çempionu, 6 dəfə ölkə kubokunun qalibi olub, UEFA Çempionlar Liqasının qrup mərhələsinə yüksələn ilk Azərbaycan klubu kimi tarixə düşüb.

Məqalədə qeyd olunur ki, “Qarabağ” son illərdə Avropa arenasında da ciddi rəqibə çevrilərək Madrid “Atletiko”sundan xal almağı, “Benfika” və “Kopenhagen” üzərində qələbələr qazanmağı bacarıb, həmçinin avrokubokların pley-off mərhələlərində uğurlu çıxışları olub.

“Futbol24” xatırladır ki, “Qarabağ” daha əvvəl də Ukrayna təmsilçiləri ilə bir neçə dəfə üz-üzə gəlib.

2014/15 mövsümündə Avropa Liqasında Ağdam klubu Kiyevdə “Dnepr”i 1:0 hesabı ilə məğlub etsə də, cavab görüşündə 1:2 uduzub. Həmin mövsüm “İnter”lə oyunda qeydə alınmayan qalmaqallı qol isə “Qarabağ”ın qrupdan çıxmasına mane olmuşdu.

2018-ci ildə isə “Qarabağ” Avropa Liqasının qrup mərhələsində “Vorskla” ilə hər iki oyunda 1:0 hesablı nəticə qeydə alıb. Kiyev “Dinamo”su ilə yeganə qarşılaşma isə Avstriyadakı təlim-məşq toplanışı çərçivəsində baş tutub və ukraynalılar minimal hesablı qələbə qazanıblar.