“Benfika” rəhbərliyi ÇL-in əsas mərhələsinin ilk oyununda “Qarabağ”a məğlubiyyəti həzm edə bilməyib və baş məşqçi Brunu Lajeni istefaya göndərib. Oyunboyu məyusluğunu gizlətməyən klub prezidenti Ruy Koşta 49 yaşlı mütəxəssislə yollarını ayırdığını təsdiqləyib. Ruy Koşta oyundan az sonra rəsmi açıqlama ilə çıxış edərək Lajenin artıq “Benfika”nın məşqçisi olmadığını bildirib: “Bu il göstərdiyi bütün səy və fədakarlığa görə ona təşəkkür edirəm. Təəssüf ki, dəyişiklik vaxtı gəlib çatdı. Yeni baş məşqçi ilə bağlı isə gözləntimiz odur ki, şənbə günü Vila das Aves-də keçiriləcək oyunda artıq texniki zonada olsun.”

49 yaşlı mütəxəssisin bu, “Qartallar”la ikinci dönəmi idi. O, 2024-cü ilin sentyabrında Lissabon klubuna qayıtdıqdan sonra yalnız Liqa Kubokunu qazana bilmişdi.

Maraqlıdır ki, Lajenin xələfi adına əsas namizədlər sırasında Joze Mourinyo da var. Məhz “Benfika”ya məğlubiyyətdən sonra Mourinyo “Fənərbaxça”dan ayrılmalı olmuşdu.