“Qalatasaray”ın uruqvaylı yarımmüdafiəçisi Lukas Torreyra İstanbulda gözlənilməz hücuma məruz qalıb. Hadisə ötən axşam Türkiyənin meqapolisindəki ticarət mərkəzlərindən birində baş verib.

Məlumata görə, futbolçu asudə vaxtını padel tennis oynayaraq keçirərkən Yusuf Y. adlı şəxs ona yaxınlaşaraq qəfil zərbə endirməyə cəhd edib. Münaqişənin böyüməsinin qarşısını isə Torreyrannın sürücüsü alıb. O, futbolçunu qorumaq məqsədilə hücum edən şəxsi vurub.

Hadisə yerindən taksi ilə qaçmağa çalışan şübhəli şəxs polis əməkdaşları tərəfindən saxlanılaraq məhkəməyə sövq edilib. Araşdırmalar zamanı məlum olub ki, Yusuf Y. əvvəllər də qəsdən sağlamlığa zərər vurma cinayətinə görə məsuliyyətə cəlb olunub.

Təcavüzkar ifadəsində hadisəni Lukas Torreyrannın sevgilisi İpek B. ilə əlaqəsinə görə törətdiyini etiraf edib. Yusuf Y.-nin həmin xanımla sosial şəbəkələrdə ünsiyyətdə olduğu və futbolçunun yerini onun paylaşımları vasitəsilə öyrəndiyini bildirilir.

Futbolçu hüquq-mühafizə orqanlarına İpek B. ilə münasibətdə olduğunu təsdiqləyib. Məlum olub ki, İpek B. daha əvvəl Yusuf Y.-yə qarşı məhkəməyə müraciət edib və həmin şəxsə xanıma yaxınlaşmaqla bağlı 45 günlük qadağa qoyulub.  Hazırda faktla bağlı araşdırmalar davam edir.