DÇ-2026-nın B qrupunun ilk turunda İsveçrə yığması Qətərlə qarşılaşıb. Matçın aşkar favoriti sayılan avropalılar artıq 2-ci dəqiqədə qapılarında qol görə bilərdilər. Edmilson Junior qapıçı ilə təkbətək qalsa da, Qreqor Kobel mükəmməl seyvlə komandasını qoldan xilas etdi.

Hesabı açmaq üçün bir neçə şansı boşa verən İsveçrə, nəhayət, 14-cü dəqiqədə penalti qazandı. Qətər qapıçısı Mahmud Abunadanın cərimə meydançasındakı aqressiv müdaxiləsindən sonra baş hakim Sayd Martines VAR-a müraciət edərək nöqtəni göstərdi. Brel Embolo zərbəni dəqiq yerinə yetirərək komandasını önə keçirdi. Murat Yakinin yetirmələri oyuna tam nəzarət etsə də, ilk hissənin sonlarında Dan Ndoye, Ruben Varqas və Mişel Ebişer real qol epizodlarından yararlana bilmədilər.

İkinci hissədə də ssenari dəyişmədi. İsveçrənin aramsız hücumları qarşısında Qətər qapıçısı Abunada fantastik qurtarışlarla komandasını darmadağından xilas edti. O, əvvəlcə Varqasın təkbətək epizoddakı zərbəsini dəf etdi, ardınca isə Yohan Manzambinin ötürməsindən sonra Embolonun qapını dəqiq nişan almasına imkan vermədi.

Matçın sonuna əlavə olunmuş vaxtda isə asiyalılar sensasiyaya imza atdılar. Xulen Lopeteginin çalışdırdığı Qətər millisi Bualem Huxinin 90+4-cü dəqiqədə vurduğu qolla məğlubiyyətdən qaça bildilər.

DÇ-2026-nın final mərhələsi

B qrupu. 1-ci tur

Qətər – İsveçrə — 1:1

Qollar: Huxi, 90+4 – Embolo, 17 (pen.)

Baş hakim: Sayd Martines (Honduras)

Stadion: “Levays Stedium” (Santa-Klara, ABŞ)

Qətər: Abunada, Əl-Ui (Fathi, 60), Huxi, Pedru Migel, Əl-Amin, Lae, Madibo (Əl-Manai, 79), Qaber (Budiaf, 60), Afif, Abdurisaq (Alaaeldin, 60), Edmilson Junior (Əl-Haydos, 89).

İsveçrə: Kobel, Elvedi, Akanji, Zakariya, Ebişer (Rider, 66), Caka, Froyler (Yaşari, 89), Rodriqes (Muqaim, 89), Varqas (Amduni, 79), Ndoye (Manzambi, 66), Embolo.

Xəbərdarlıqlar: Abunada, 16; Qaber, 23 – Zakariya, 42