Portuqaliya polisi “Balkan karteli”nə qarşı keçirdiyi xüsusi əməliyyat çərçivəsində serbiyalı sabiq futbolçu Uroş Miloşeviçi həbs edib.

Yerli “O Jogo” nəşrinin məlumatına görə, 31 yaşlı oyunçu A6 magistralında idarə etdiyi furgonda saxlanılıb. Avtomobilə baxış zamanı dəyəri təqribən 70 milyon avro olan 1,5 tondan çox kokain və istifadəyə hazır vəziyyətdə iki döyüş silahı aşkarlanıb.

Geniş futbol ictimaiyyətinə o qədər də tanış olmayan Miloşeviç karyerası ərzində əsasən Serbiyanın “Çukariçki”, “İM Rakovitsa”, “Teleoptik” və “Sinceliç” kimi klublarının formasını geyinib. O, son üç ildir heç bir komandada çıxış etmir.

İstintaq orqanlarının məlumatına görə, bu həbs İspaniya və Portuqaliya polisinin ötən həftə 3,7 ton narkotik maddənin müsadirəsi ilə nəticələnən müştərək əməliyyatının davamıdır. Avropa bazarına Portuqaliya sahillərindən narkotik daşıyan “Balkan karteli”nin bu məqsədlə keçmiş yuqoslaviyalı idmançılardan da istifadə etdiyi ehtimal olunur.

Hazırda sabiq futbolçunun cinayətkar şəbəkədəki dəqiq rolunu müəyyənləşdirmək üçün araşdırmalar davam edir. Yaxın vaxtlarda yeni həbslərin olacağı istisna edilmir.