“Qarabağ” Türkiyənin Antalya şəhərində keçirilən təlim-məşq toplanışı çərçivəsində möhtəşəm bir gün keçirib. Qurban Qurbanovun rəhbərlik etdiyi komanda bir gündə iki yoldaşlıq görüşünə çıxıb. Günü xorvat klubu “Osiyek” üzərində qələbə ilə başlayan “Köhlən atlar”, axşam saatlarında Polşa təmsilçisi “Zaqlembe”ni də eyni aqibətlə üz-üzə qoyublar.

Matça iddialı başlayan “Qarabağ” artıq 6-cı dəqiqədə Andradenin qolu ilə önə keçib. Polyaklar birinci hissədə bərabərliyi təmin etsələr də, fasilədən sonra “Qarabağ”ın təzyiqi qarşısında tab gətirə bilməyiblər. Zubir və Montielin qolları “atlılar”ın üstünlüyünü rəsmiləşdirib.

“Qarabağ” (Azərbaycan) – “Zaqlembe” (Polşa) 3:1 (1:1)

Leandro Andrade, 6′ (1:0); Abdellah Zubir, 56′ (2:1); Fabian Montiel, 69′ (3:1)

Polşanın “Sport.pl”, “Przegląd Sportowy” və “Mks-zaglebie.pl” kimi aparıcı platformaları bu məğlubiyyəti “güclü rəqiblə sınaq” kimi dəyərləndiriblər.

“Qarabağ” Kabusu Polşa Klublarını Təqib Etməkdə Davam Edir

Polşalı jurnalistlər “Qarabağ”ın son illərdə “Lex”, “Rakuv” və “Legiya” kimi klublarına qarşı keçirdiyi rəsmi oyunlardakı üstünlüyünü xatırladaraq yazıblar: “Yoldaşlıq görüşü olmasına baxmayaraq, “Qarabağ” yenə də öz səviyyəsini göstərdi. “Zaqlembe” Azərbaycan çempionunun sürətli hücum xətti qarşısında müdafiədə ciddi boşluqlar verdi.”

Zubir və Andrade: Polşa müdafiəsini darmadağın edən cütlük

“SportoweFakty” portalı “Qarabağ”ın legionerlərinin fərdi ustalığını xüsusi qeyd edib:“Abdellah Zubir hələ də Polşa klubları üçün ən təhlükəli oyunçulardan biridir. Onun topu saxlama texnikası və Andradenin sürətli cinah hücumları “Zaqlembe”nin oyun planını alt-üst etdi. 3:1 hesabı meydandakı reallığı tam əks etdirirdi.”

Fiziki hazırlıq və sistem fərqi

Polşa portalları qeyd edirlər ki, “Zaqlembe” hələ toplanışın ağır fazasında olduğu halda, “Qarabağ”ın oyunundakı sinxron hərəkətlər və sistemli pressinq rəqibi çıxılmaz vəziyyətə salıb. Jurnalistlər “Zaqlembe”nin hücum xəttinin “Qarabağ” müdafiəsini yarmaqda çətinlik çəkdiyini etiraf ediblər.