İngiltərənin “Nyukasl Yunayted” klubunda baş məşqçi dəyişikliyi gözlənilir. The Guardian nəşrinin məlumatına görə, Eddi Hau təxminən beş illik fəaliyyətindən sonra komandadan ayrılmağa qərar verib.

Mənbənin iddiasına əsasən, 48 yaşlı mütəxəssis gərgin iş qrafikindən sonra futboldan qısa fasilə götürmək niyyətindədir. Hau bu müddətdə “Nyukasl”ı 2025-ci ildə Liqa Kubokunun qalibi edib, həmçinin komandaya iki dəfə UEFA Çempionlar Liqasına vəsiqə qazandırıb.

Maraqlıdır ki, Hau cəmi bir gün əvvəl “Bristol”la yoxlama oyunundakı 1:4 hesablı məğlubiyyətdən sonra klubdakı gələcəyi ilə bağlı nikbin danışmışdı.

“Bu klubu sevirəm və bu heç vaxt dəyişməyəcək. İnanıram ki, hər mövsüm böyük uğurlar qazana bilərik”, – deyə o bildirmişdi.

Xəbərə görə, “Nyukasl” artıq Səudiyyə Ərəbistanının “Əl-Əhli” klubunun baş məşqçisi Matias Yaysle ilə danışıqlara başlayıb. Hər iki klubun eyni sahib – Səudiyyə Ərəbistanı Dövlət İnvestisiya Fonduna (PIF) məxsus olması mümkün keçidi asanlaşdıra bilər.

Ötən mövsüm Premyer Liqanı 12-ci pillədə başa vuran “Nyukasl” Entoni Qordon və Sandro Tonali kimi aparıcı futbolçularını da itirib. Bundan əlavə, Ross Uilsonun idman direktoru təyin olunmasından sonra Hau transfer siyasətinə əvvəlki kimi təsir göstərə bilmir.