Artıq rəsmidir! Aprelin 19-u, bazar günü “Bavariya” mövsümün bitməsinə dörd tur qalmış ən yaxın izləyicisi ilə xal fərqini əlçatmaz edərək 2025/26 mövsümünün Almaniya çempionu adını qazandı. Münhen təmsilçisi bu uğura sadəcə xal qazanmaqla deyil, möhtəşəm bir oyuna və inanılmaz bir rekorda imza ataraq çatdı. Budur, həlledici günün detalları!
Matçın 52-ci dəqiqəsində Harri Keyn adını tabloya yazdıraraq üstünlüyü möhkəmləndirdi. Qonaqların yeganə cavab qolu isə 88-ci dəqiqədə gəldi – Xema Andresin dəqiq zərbəsi “Ştutqart” üçün sadəcə təsəlliverici top oldu.
Şənbə günü Dortmund “Borussiya”sının “Hoffenhaym”a məğlubiyyəti “Bavariya”nın işini asanlaşdırmışdı – çempionluğu sona 4 tur qalmış rəsmiləşdirmək üçün münhenlilərə cəmi 1 xal kifayət edirdi. Lakin Kompaninin yetirmələri azarkeşlərini maksimum nəticə ilə sevindirərək 3 xal qazandılar. Beləliklə, xal fərqini 15-ə çatdıran “Bavariya” Bundesliqa çempionluğunu möhtəşəm şəkildə elan etdi.
Baş məşqçi Vensan Kompani komandanı inanılmaz dərəcədə effektiv və məhsuldar bir futbol maşınına çevirib. “Bayern & Germany” nəşrinin məlumatına görə, Alfonso Devisin vurduğu qol “Bavariya”nın bu mövsüm bütün turnirlərdəki 160-cı qolu kimi tarixə düşüb. Beləliklə, münhenlilər klubun 6 il əvvəlki məhsuldarlıq rekordunu yeniləməyi bacarıblar.
Klubun əzici üstünlüyü statistikada da özünü qabarıq göstərir. Bundesliqada +80 top fərqinə malik olan “Bavariya”, bu göstəricidə ən yaxın izləyicisi “Borussiya”nı (Dortmund) düz 50 top qabaqlayır (+30).
Bavariyalılar üçün mövsüm hələ bitməyib, onları qarşıda Çempionlar Liqası həyəcanı gözləyir. “Real” səddini keçən “Bavariya”, indi yarımfinalda PSJ ilə üz-üzə gələcək. Klubun daxili arenadakı “qızıl dubl” hədəfi də aktuallığını qoruyur. “Bavariya” aprelin 22-də Almaniya Kubokunun yarımfinalında Leverkuzen “Bayer”i ilə üz-üzə gələcək.