DÇ-2026-nın 1/8 final mərhələsindəki dramatik Argentina – Misir matçından sonra ehtiraslar səngimək bilmir. Misir millisinin hücumçusu Mostafa Ziko turnirin son çempionları və qarşılaşmanın baş hakiminin ünvanına kəskin ittihamlar səsləndirib.

Görüşün gedişatı heç də gözlənildiyi kimi olmayıb. Matçın son dəqiqələrinə qədər 0:2 hesabı ilə geridə olan Argentina, möcüzəvi şəkildə ardıcıl 3 qol vuraraq 3:2 hesablı qələbəyə sevinib. Bununla da Lionel Messinin komandası 1/4 finala yüksəlsə də, oyundan sonrakı qalmaqal matçın özü qədər səs-küy doğurub.

Misir millisinin qol müəlliflərindən biri olan Ziko final fitindən dərhal sonrakı bəyanatda rəqibi və hakimliyi sərt tənqid edib: “Biz əldə etdiyimiz nəticə ilə fəxr edirik. Argentina artıq dünya çempionudur, amma yaxşı olardı ki, onlar bu öz güclərinə etsinlər. Dünya çempionuna qarşı oynamağın nə qədər çətin olacağını bilirdik. Komanda yoldaşlarım əsl kişidirlər və dünyanın ən yaxşı insanlarıdırlar, Allaha şükürlər olsun. Bu, Allahın iradəsidir və nəticə də Ondan gəlir. Lakin hakim ədalətsiz idi, mənə tək Allah bəs edər. O, bütöv bir xalqın əməyini yerə vurdu. Görünən odur ki, kubok yenə Argentinaya veriləcək.”

Meydanda 39 yaşlı Cənubi Amerika ulduzu Lionel Messinin göz yaşları fonunda, Misir millisinin üzvləri heç olmasa bərabərlik qolunu vurub oyunu əlavə vaxta apara bilmədiklərinə görə böyük məyusluq yaşayıblar.

Məğlubiyyətə baxmayaraq, Misir prezidenti Əbdülfəttah əs-Sisi komandanın mundialdakı çıxışını yüksək qiymətləndirib. Futbolçulara təbrik mesajı ünvanlayan dövlət başçısı, ölkə futbolu tarixində görünməmiş nəticəyə və nümayiş olunan layiqli oyuna görə “qəhrəmanlara” təşəkkür edib. Komandanın uğurları ilə fəxr etdiyini bildirən əs-Sisi, “İnşallah, gələcək sizin üçün daha parlaq olacaq” deyə əlavə edib.

İndi Argentinanı 1/4 finalda ciddi sınaq gözləyir. “Tanqoçular” növbəti mərhələdə Kolumbiya – İsveçrə cütlüyünün qalibi ilə qarşılaşacaqlar. Turnirin yarımfinalında isə onları Norveç – İngiltərə matçının qalibi gözləyə bilər.