Argentina millisinin üzvü Lionel Messi yoldaşlıq oyununda İslandiya qapısına yol tapmaqla növbəti tarixi nailiyyətə imza atıb. 3:0 hesablı qələbə ilə başa çatan görüşdə 72-ci dəqiqədə penaltini dəqiq yerinə yetirən 38 yaşlı hücumçu, milli formayla vurduğu qolların sayını 117-yə çatdırıb.

Bununla da Messi 38 yaş 350 günlüyündə Argentina yığmasının heyətində fərqlənən ən yaşlı oyunçu kimi tarixə düşüb. O, bu göstərici ilə 1957-ci ilin iyulunda əfsanəvi Anxel Labrunanın müəyyənləşdirdiyi (38 yaş, 282 gün) uzunömürlü rekordu yeniləyib.

Argentina futbolunun canlı əfsanəsi olan Anxel Labruna (1918–1983) “River Pleyt”in 1940-cı illərdəki məşhur “Maşın” (“La Máquina”) komandasının lideri kimi tarixə düşüb. Karyerasının böyük hissəsini vətənində keçirən hücumçu, xüsusilə “Superklasiko”ların ən məhsuldar oyunçusu olması ilə yadda qalıb. “Boka Xuniors”un qapısına 16 dəfə yol tapan Labrunanın “Bombonera” stadionuna çıxarkən rəqib azarkeşləri qıcıqlandırmaq üçün burnunu tutması, bu gün də argentinalı azarkeşlər arasında ən yaddaqalan jestlərdən biri sayılır.