Ölkəmizin klubları avrokubokların cari mövsümünə möhtəşəm start verərək milli futbol tarixinə yeni səhifə yazıblar. Mübarizəyə I təsnifat mərhələsindən qoşulan “Qarabağ”, “Sabah” və “Zirə” keçirdikləri hər iki qarşılaşmanı qələbə ilə başa vuraraq 100%-lik nəticə göstəriblər.
Mərhələnin nəticələri:
“Qarabağ” – “Vestri” (İslandiya) 3:0, 3:0
“Sabah” – TNS (Uels) 2:0, 2:1
“Zirə” – “Torpedo” (Gürcüstan) 3:0, 3:0
Ümumilikdə 16:1 top fərqi ilə çıxış edən təmsilçilərimiz, Azərbaycan futbolu tarixində avrokubokların bir mərhələsində ən çox qələbə (6 oyun, 6 qələbə) qazanmaqla ölkə futbolunda yeni rekorda imza atıblar. Bu nailiyyət Azərbaycanı turnirdə mübarizəyə başlayan 33 ölkə arasında qələbə sayına görə zirvəyə yüksəldib.
Qazanılan bu uğur Azərbaycanın UEFA reytinqinə də müsbət təsir göstərib. Cari mövsümdə əmsalını 1,500-ə çatdıran ölkəmiz, ümumi reytinq cədvəlində 20,062 xalla 26-cı pillədə qərarlaşıb.