Madrid “Real”ının yeni mövsümdə keçirdiyi ilk rəsmi matç Vinisius Junior ətrafında müzakirə və mübahisələrlə yadda qalıb. “Espanyol” üzərində 2:1 hesablı qələbə ilə başa çatan görüşdə 26 yaşlı braziliyalı hücumçunun bir neçə epizodda simulyasiyaya əl atması meydanda gərginlik yaradıb.

Vinisiusun bu davranışı “Kral klubu”nun sabiq qapıçısı Santyaqo Kanisarezin sərt tənqidinə səbəb olub. “Real”ın heyətində iki dəfə İspaniya çempionu və Çempionlar Liqasının qalibi olan keçmiş qolkiper hesab edir ki, belə xarakterə malik futbolçuya iddialı klublarda ehtiyac yoxdur.

“Bu yay ciddi müzakirələr gedirdi. Müqaviləsinin başa çatmasına cəmi bir il qalmışdı və vəziyyət aydın idi: ya onu satmalı, ya da komandada saxlamalı idilər. Və bilirsiniz nə baş verdi? Əslində, onu heç kim istəmir”, – deyə Kanisarez bildirib.

Sabiq qapıçı daha da irəli gedərək, Vinisiusun transfer bazarında tələbat görmədiyini və hətta klubsuz qala biləcəyini iddia edib:

“Heç kim komandasında belə oyunçu görmək istəmir. Düşünmürəm ki, ona ciddi təklif gəlib. “Real” onunla müqaviləni uzatmağa məcbur qaldı. Güman ki, heç bir klub onun özü və ya agenti ilə əlaqə saxlamamışdı. Belə keyfiyyətlərə malik futbolçuya tələbat yoxdur. Bəlkə hansısa kiçik klub onu götürər… Məsələn, “Nyukasl”. Ümumiyyətlə, Vinisius haqqında danışanda təzyiqim qalxır”.

Qeyd edək ki, ötən mövsüm “Real”ın formasını 53 matçda geyinən Vinisius 22 qol vurub və 14 məhsuldar ötürmə edib. “Transfermarkt” portalı braziliyalı hücumçunun bazar dəyərini 140 milyon avro qiymətləndirir. Vinisius yaxın günlərdə Madrid klubu ilə müqaviləsini 2032-ci ilin yayına qədər uzadıb.