Dünya şöhrətli mütəxəssis Joze Mourinyo Argentina və Misir yığmaları arasında keçirilən oyunda baş verən hakim qərarlarına kəskin reaksiya verib. Portuqaliyalı məşqçi görüşdəki epizodların qiymətləndirilməsində obyektivliyin pozulduğunu iddia edib: “Bu, açıq-aşkar soyğunçuluqdur. Futbolun nəyə çevrildiyini görmək utanc vericidir. Oyunu davam etdirməyə, qol vurulmasına imkan verib, sonra onu ləğv etmək nə dərəcədə düzgündür? Əgər qayda pozuntusu var idisə, hakim oyunu dərhal saxlamalı idi. Qol vurulmasını gözləməyə ehtiyac yox idi. Onda başqa bir sual yaranır: nə üçün Argentinanın vurduğu ilk qol eyni diqqətlə araşdırılmadı? Hərçənd həmin epizod oyundankənar vəziyyətə çox bənzəyirdi.

Niyə Argentinanın iştirak etdiyi hər bir epizod diqqətlə yoxlanıldığı halda, Misirə qarşı eyni diqqət göstərilmədi? VAR çaşqınlıq yaratmaq üçün yox, ədaləti təmin etmək üçündür. Görünür, bu gün bütün vacib qərarlar Argentinanın lehinə verildi. Futbol bundan daha yaxşısına layiqdir”.

Mourinyo, həmçinin İspaniyaya qarşı matçda Portuqaliya milli komandasının nümayiş etdirdiyi oyunu və xüsusən də yarımmüdafiə xəttini kəskin tənqid edib. Təcrübəli mütəxəssisin fikrincə, komandanın uğursuzluğunun əsas səbəbi Kriştianu Ronaldunun meydanda yalnız buraxılması olub: “Portuqaliya millisi eqoist və həddindən artıq şişirdilmiş futbolçulardan ibarətdir. Dünyanın ən yaxşı üç yarımmüdafiəçisinə sahib olduğunuzu iddia etdiyiniz halda, 90 dəqiqə ərzində qol vurmaq üçün tək bir real imkan belə yarada bilmirsinizsə, bu nə dərəcədə doğrudur? Ronaldu matç boyunca rəqib cərimə meydançası daxilində dəfələrlə doğru açılışlar etdi, lakin bir dəfə də olsun ötürmə ala bilmədi. O, meydanda tamamilə tək qaldı – nə bir cinah asması, nə də dəqiq pas ona çatdı.

Nə Bruno Ferneş, nə Ruben Neveş, nə də Vitinya bütün oyun ərzində Ronaldu üçün tək bir təhlükəli vəziyyət belə yarada bilmədilər. Heç biri! Üstəlik, özləri də fərqlənməyi bacarmadılar. Ronaldu oyun boyunca komanda yoldaşlarından heç bir dəstək almadı. Bruno Ferneş bu çempionatda Portuqaliyanın əsas ulduzu olmalı idi. Bəs o, reallıqda nə etdi? Düşünürəm ki, komandanın dörddəbir finala yüksələ bilməməsinin başılıca səbəbkarı elə Ronaldunun komanda yoldaşları oldu”.