İsveçrə Superliqasında sensasiya yaşanıb. Ölkə çempionatının debütantı “Tyun” klubu, 128 illik tarixinin ilk çempionluğunu rəsmiləşdirib. 1898-ci ildə təsis edilən və cəmi bir il əvvəl elitaya qayıdan komanda, İsveçrə futbolunun zirvəsinə yüksəlib.

Çempionluq yolu “Tyun” üçün asan olmayıb. Şənbə günü səfərdə “Bazel”ə 1:3 hesabı ilə məğlub olan lider, bayram hazırlıqlarını bir qədər təxirə salmalı olmuşdu. Lakin çempionluq taleyi bazar günü “Sankt-Qallen”in büdrəməsi ilə həll olunub. Əsas izləyici olan “Sankt-Qallen” öz meydanında “Sion”a 0:3 hesabı ilə uduzaraq “Tyun”u əlçatmaz edib. Çempionatın sona çatmasına 3 tur qalmış liderlə ikinci yer arasındakı xal fərqi 11-ə yüksəlib.

“Tyun” azarkeşləri bu tarixi anı öz stadionlarında qurulmuş böyük ekranda izləyiblər. “Sankt-Qallen”in məğlubiyyətindən sonra Aare çayı sahilində yerləşən kiçik Tyun şəhərində əsl bayram ab-havası yaşanıb. Şəhər şurası tarixi qələbə münasibətilə restoran və barların 24 saatlıq iş rejiminə keçməsinə icazə verib.

Mövsümün əvvəlindən liderliyi əldən verməyən komanda, son 5 oyundan 4-də məğlub olsa da, topladığı xal ehtiyatı sayəsində İsveçrə futbolunda yeni səhifə açmağı bacarıb.