“Mançester Siti” klubu hüquqi müstəvidə ciddi addım atmağa hazırlaşır. Buna səbəb “Real Madrid” klubunun prezidentliyinə namizəd Enrike Rikelmenin “şəhərlilər”in ulduz futbolçuları Erlinq Holand və Rodrini Madridə gətirəcəyi ilə bağlı verdiyi iddialı bəyanatdır.

İspaniyanın günəş enerjisi istehsalı sahəsində fəaliyyət göstərən “Cox Energy” şirkətinin sahibi və prezidenti, 37 yaşlı Enrike Rikelme Vives “Kral klubu”na rəhbərlik üçün rəsmi sənədlərini təqdim edib. O, Madrid təmsilçisinin çoxillik prezidenti Florentino Peresin uzun müddətdən sonra ilk ciddi rəqibinə çevrilib.

Rikelme qatıldığı televiziya verilişlərinin birində səs-küylü vədlər verərək diqqətləri üzərinə çəkib. O, canlı efirdə arxasında “Haaland” yazılmış “Real” formasını nümayiş etdirərək deyib: “Prezident seçiləcəyim təqdirdə, Erlinq Holandı “Real”a gətirəcəyəm. Ondan dərhal sonra isə növbəti hədəfimiz Rodri olacaq. Holandın müqaviləsində sərbəstqalma bəndi var və mən onu mütləq Madridə görmək istəyirəm“.

Mançester təmsilçisi madridli namizədin bu çıxışına gecikmədən və olduqca sərt reaksiya verib. Klub rəhbərliyi namizədin sözlərini qətiyyətlə pisləyib: “Madrid mətbuatında futbolçumuz Holandın gələcəyi ilə bağlı yayılan şayiələrin real əsası yoxdur. Oyunçunun müqaviləsində iddia olunan bəndlər mövcud deyil və bu xəbərlərin doğruluq payı yoxdur. Futbolçumuzun adından seçki kampaniyasında bu cür kontekstdə istifadə olunduğu üçün”Real”a qarşı məhkəmə iddiası qaldırmağı nəzərdən keçiririk”.

Bu seçki “Real”ın idarəçilik tarixində son illərin ən maraqlı hadisələrindən biri olacaq. Belə ki, 79 yaşlı tikinti maqnatı Florentino Peresin 2006-cı ildən bəri keçirilən seçkilərdə qarşısına heç bir rəqib çıxmayıb və o, səlahiyyət müddəti bitdikdən sonra səsverməyə yeganə namizəd kimi qatılıb. “Kral klubu”nda böyük maraqla gözlənilən prezident seçkiləri iyunun 7-də baş tutacaq.

Xatırladaq ki, norveçli hücumçu Erlinq Holand 2022-ci ildə Dortmund “Borussiya”sından transfer olunduğu gündən “Mançester Siti”nin formasını geyinir.