Avropa klub turnirlərində uğursuz çıxış edən Türkiyənin aparıcı klubları baş məşqçiləri ilə vidalaşıb. “Beşiktaş” rəhbərliyi Konfrans Liqasının pley-off mərhələsində İsveçrənin “Lozanna-Sport” klubuna məğlubiyyətin ardından norveçli Ule Qunnar Sulşer ilə olan müqaviləni qarşılıqlı razılaşma əsasında dayandırıb. Klubun açıqlamasında deyilir: “Baş məşqçimiz Ule Qunnar Sulşer ilə olan müqaviləmiz, İdarə Heyətinin iclasında qəbul edilən qərara əsasən ləğv edilmişdir. Klubumuzun prezidenti Serdal Adalı, görüş sonrası Sulşerə bu günədək göstərdiyi xidmətlərə görə təşəkkür etmişdir. Məlumatı ictimaiyyətin diqqətinə çatdırırıq.”
“Fənərbaxça” isə Çempionlar Liqasının pley-off mərhələsində “Benfika” səddini aşa bilmədiyi üçün baş məşqçi Joze Mourinyonu yola salıb. 2024–2025 mövsümü öncəsi böyük ümidlərlə vəzifəyə gətirilən portuqaliyalı mütəxəssis sarı-lacivərdlərin başında ümumilikdə 62 oyuna çıxıb. Bu müddətdə komanda 37 qələbə, 14 heç-heçə və 11 məğlubiyyət əldə edib. Ayrıldığı klublardan indiyə qədər 115 milyon avro alan Maurinyo “Fənərbaxça”dan 15 milyon avro təzminat əldə edəcək. Bu bacarığına görə portəgiz məşqçiyə Türkiyədə “Təzminator” ləqəbi verilib.