Premyer Liqanın 30-cu turu çərçivəsində doğma meydanda “Neftçi”ni qəbul edən “Karvan-Yevlax” rəqibinə 0:3 hesabı ilə məğlub olub. Qarşılaşmadan sonra təşkil olunan mətbuat konfransında bölgə təmsilçisinin baş məşqçisi Füzuli Məmmədov jurnalistlərin suallarını cavablandıraraq oyunla bağlı fikirlərini bölüşüb.

Baş məşqçi ilk növbədə matçın ümumi mənzərəsini dəyərləndirib və komandasının hazırlıq səviyyəsinə toxunub: “Oyun barədə çox danışmağa lüzum görmürəm. Bu matça ciddi hazırlaşmışdıq və azarkeşlərimiz önündə daha yaxşı çıxış edəcəyimizi düşünürdük. İlk qola qədər komanda müəyyən etdiyimiz plan üzrə hərəkət edirdi. Lakin buraxdığımız qol, xüsusən də müdafiədəki mövqe səhvi futbolçulara mənfi təsir göstərdi”.

Jurnalistlərin komandanın oyunundakı enişlə bağlı sualına Məmmədov belə aydınlıq gətirib: “Düşünmürəm ki, birinci qol bizi tamamilə sındırdı. Əsas qırılma nöqtəsi birinci hissənin sonlarında gələn ikinci top oldu. Rəqibin bu qədər rahat fərqlənəcəyini gözləmirdik. İkinci qoldan sonra oyunumuzda aşkar düşüş yaşandı. Hesab 0:2 olandan sonra geridönüş etmək çox çətin idi. Bu, futbolun psixoloji tərəfidir”.

Turnir cədvəlindəki vəziyyəti və əsas rəqibləri olan “Qəbələ” ilə müqayisəni şərh edən mütəxəssis ümidini itirmədiyini bildirib: “Həm “Qəbələ” üçün, həm də bizim üçün qarşıdakı oyunlar çətindir. Hazırda aramızda 6 xallıq fərq var. Rəqibi öz meydanımızda qəbul edəcəyik. Bu xal fərqini aradan qaldırmaq üçün hər oyuna final kimi hazırlaşacağıq. Şansımız varsa, son ana qədər mübarizəni davam etdirəcəyik”.Son turlarda eyni hədəf uğrunda yarışan komandaların oyun saatlarının fərqli olmasına da toxunan baş məşqçi, bunun bərpa prosesinə təsir etdiyini vurğulayıb: “Bəli, biz rəqiblə müqayisədə daha az istirahət edəcəyik. Amma təqvim belə qurulub və buna uyğunlaşmalıyıq. Bütün planlarımızı mövcud qrafikə əsasən qurub, növbəti matçlara hazırlaşacağıq”.