Mundialın 1/4 final mərhələsi çərçivəsində keçirilən Fransa – Mərakeş qarşılaşması gözlənildiyi kimi gərgin və emosional keçdi. Kilian Mbappenin qeyri-dəqiq penaltisi ilə başlayan həyəcan, sonda fransızların 2:0 hesablı inamlı qələbəsi və yarımfinala yüksəlməsi ilə nəticələndi.
Matçın start fitindən etibarən fransızlar oyunun nəzarətini tam əlinə aldı. “Xoruzlar” rəqibini öz cərimə meydançasına sıxışdıraraq təzyiqi artırdı. İlk dəqiqələrdən Kilian Mbappenin fəallığı diqqət çəkirdi; onun və Dayo Upamekanonun başla zərbəsi zamanı Mərakeşin qapıçısı Yassin Bunu komandasını qoldan vəziyyətdən xilas etdi.
Oyunun 28-ci dəqiqəsi qarşılaşmanın ən mübahisəli anı oldu. Nüssair Məzrauinin Mbappeyə qarşı qaydanı pozması nəticəsində təyin olunan penaltini elə zərərçəkənin özü yerinə yetirdi. Lakin Buno futbolçunun niyyətini oxuyaraq topu dəf etdi.
Yeri gəlmişkən, Archivo VAR platforması epizodu təhlil edərək, Mbappenin rəqiblə hər hansı kontakt yaşanmazdan əvvəl özünü yerə atdığını vurğulayıb və bu qərarı VAR sisteminin “qorxaqlığı” kimi qiymətləndirib. Fransız hücumçuya simulyasiyaya görə sarı vərəqə verilməli olduğunu bildirib. Bu epizod sosial şəbəkələrdə və ekspertlər arasında geniş müzakirələrə səbəb oldu.
Fasilədən sonra üstünlüyünü qoruyan Fransa, nəhayət, 60-cı dəqiqədə istəyinə çatdı. Dezire Duenin məhsuldar ötürməsini ustalıqla dəyərləndirən Kilian Mbappe, rəqib müdafiəçilərini şahmat gedişləri ilə keçərək hesabı açdı.
Bu qoldan cəmi 6 dəqiqə sonra Usman Dembele cərimə meydançası xaricindən endirdiyi dəqiq və güclü zərbə ilə fərqi ikiyə çatdırdı.
Oyunun sonlarına doğru Mbappenin aldığı zədə azarkeşləri bir anlıq təşvişə salsa da, hücumçunun meydanı köməksiz tərk etməsi narahatlığı nisbətən azaltdı. Mərakeş millisi 83-cü dəqiqədə Əzzədin Unahinin təhlükəli zərbəsi ilə qol vurmağa yaxın olsa da, Mayk Menyannın inamlı oyunu hesabın dəyişməsinə imkan vermədi.
Fransa bu qələbə ilə ardıcıl üçüncü dəfə dünya çempionatında medallar uğrunda mübarizə aparmaq şansı qazandı. Mərakeş isə 4 il əvvəlki tarixi uğurunu təkrarlaya bilməyərək, turnirlə vidalaşdı.
İyulun 14-də keçiriləcək yarımfinalda Fransanın rəqibi İspaniya – Belçika cütünün qalibi ilə olacaq.
Dünya çempionatı, 1/4 final
Fransa – Mərakeş: 2:0
Qollar: Mbappe, 60. Dembele, 66
Qaçırılan penalti: Mbappe, 28
Baş hakim: Tello (Argentina)
Fransa: Mənyan, Upamekano, Saliba, Din, Kunde (Qüsto, 87), Kone (Zair-Emeri, 71), Rabyo, Olise, Due (Barkolya, 77), Dembele, Mbappe (Mateta, 77).
Mərakeş: Bunu, Məzraui, Diop, Salah-Eddin (Ouadi, 74), Həkimi, Buaddi (Amrabat, 62), El-Aynaui, Unahi, Talbi (Sbai, 85), Diaz (Yasin, 74), El-Hannus (Rahimi, 62)
Sarı vərəqə: Diop, 63
Stadion: “Gillette Stadium”, Foksboro