Bəzən həqiqət ən pis uydurmadan daha inanılmaz görünür. Təsəvvür edin: Bir ölkə dörd il boyu Dünya Çempionatına vəsiqə qazanmaq üçün tər tökür, rəqiblərini və oynayacağı şəhərləri öyrənir… Və qəfil turnirin ev sahibi olan ölkə ona qarşı müharibəyə başlayır.

2026-cı ilin fevralında ABŞ və İsrailin İranda başladığı hərbi əməliyyat nəticəsində ali rəhbər Ayətullah Əli Xameneyi də daxil olmaqla minlərlə insan həlak oldu. Martın 11-də İranın idman naziri Əhməd Dunyamali acı reallığı səsləndirdi: “Liderimizi öldürən, şəhərlərimizi bombalayan ölkəyə futbol oynamağa gedə bilmərik”.

Bu faciəvi mənzərənin fonunda FIFA prezidenti Canni İnfantino isə sosial şəbəkələrdə nikbinlik nümayiş etdirir. O, ABŞ prezidentinin təminat verdiyini və “futbolun dünyanı birləşdirdiyini” yazır. Bu, FIFA-nın real dünyadan nə qədər qopduğunun rəsmi sübutudur.

İran futbolu hazırda çıxılmaz vəziyyətdədir:

İştirak etməsə: 300-600 min dollar cərimə, hazırlıq pullarının qaytarılması və gələcək turnirlərdən, hətta FIFA-dan kənarlaşdırılma təhlükəsi.

İştirak etsə: Öz vətəndaşlarını bombalayan ölkənin meydançasında top qovmağın mənəvi yükü.

İranın yerinə əsas namizəd İraqdır. Lakin burada da lojistik cəhənnəm hökm sürür. İraqın baş məşqçisi Qrem Arnold hava məkanının bağlanması səbəbindən BƏƏ-də qalıb, oyunçuların viza problemləri isə həll olunmur.

Bəs Rusiya? Rusiyalı futbol funksioneri Vyaçeslav Koloskovun dediyi kimi, Rusiya hələ də beynəlxalq turnirlərdən kənardadır, ona görə də yer yalnız Asiya Konfederasiyasının növbəti komandasına verilə bilər.

FİFA reytinqində 20-ci yerdə olan, Sərdar Azmun kimi ulduzları olan İran yığması üçün bu, ardıcıl dördüncü mundial olmalı idi. İndi isə hər şey sual altındadır.Dünya Çempionatının başlamasına 100 gündən az vaxt qalıb. İnfantino fotolarda gülümsəməyə davam edir, iranlı futbolçular isə qeyri-müəyyənlik içində gözləyirlər. Futbol artıq siyasətdən ayrı deyil – o, tarixin ən böyük və bəlkə də ən qəddar ssenarisinin bir parçasına çevrilib.