Şimali, Mərkəzi Amerika və Karib dənizi hövzəsi Futbol Konfederasiyası (KONKAKAF) FİFA-nın böyük turnirlərin kommersiya hüquqlarını özəl investorlara satmaq planına sərt etirazını bildirib. UEFA-nın analoji və daha kəskin addımından sonra ali futbol qurumunda ciddi parçalanma təhlükəsi yaranıb.

KONKAKAF prezidenti Viktor Montalyaninin və quruma üzv 41 milli assosiasiyanın rəhbərlərinin iştirakı ilə keçirilən iclasda FİFA-nın təklifi yekdilliklə rədd edilib. Yayılan bəyanatda bildirilib ki, belə mühüm qərarın qəbul edilməsi üçün süni şəkildə həddindən artıq qısa vaxt ayrılıb, müvafiq nəzarət mexanizmlərinin təhlili aparılmayıb və proses lazımi şəffaflıq şəraitində həyata keçirilməyib. Sənəddə, həmçinin tarixin ən gəlirli Dünya Çempionatlarından birinin ardından FİFA-nın özəl investorların maliyyəsinə nə üçün ehtiyac duyduğu sual altına qoyulub.

KONKAKAF FİFA prezidenti Canni İnfantinoya nizamnaməyə riayət etməyi və layihələri mövcud ehtiyatlar hesabına maliyyələşdirməyi tövsiyə edib.

İnfantinonun «unikal imkan» kimi müdafiə etdiyi layihə «FIFA Forward Enterprise» (FFE) adlı yeni qurumun yaradılmasını nəzərdə tutur. Dünya Çempionatı və Klublararası Dünya Çempionatının kommersiya hüquqlarını idarə edəcək bu şirkətin ümumi dəyəri 20 milyard dollar qiymətləndirilir.

Bundan əvvəl UEFA və ona üzv olan 55 federasiya layihəyə qarşı çıxaraq, plan ləğv olunana qədər FİFA-nın bütün turnirlərini boykot edəcəyini elan etmişdi.

Beləliklə, FİFA-ya üzv 211 assosiasiyadan 96-sı artıq özəlləşdirmənin əleyhinədir. «Bir ölkə — bir səs» prinsipi ilə fəaliyyət göstərən sistemdə İnfantinonun lazımi səs çoxluğunu toplaması sual altına düşür. 10 federasiyadan ibarət Cənubi Amerika konfederasiyası (KONMEBOL) isə hələlik bu məsələdə mövqeyini açıqlamayıb.