Bu gün UEFA Konfrans Liqasının II təsnifat mərhələsinin cavab oyununda “Zirə” Sumqayıtda Estoniyanın “Payde” klubunu qəbul edəcək.

Estoniya mətbuatı “Payde”nin Bakıya böyük inamla yollandığını yazır. Yerli KİV-lər ilk oyunda qazanılan 1:0 hesablı qələbənin komandanın üstünlüyünü artırdığını qeyd etsələr də, cavab qarşılaşmasının olduqca çətin keçəcəyini vurğulayırlar.

Məqalələrdə bildirilir ki, ilk görüşdə topa daha çox nəzarət edən tərəf “Zirə” olsa da, “Payde” intizamlı müdafiəsi və uğurlu əks-hücumları sayəsində minimal hesablı qələbəni qorumağı bacarıb. Estoniya təmsilçisinin əsas hədəfinin Sumqayıtda bu üstünlüyü saxlayaraq UEFA Konfrans Liqasının III təsnifat mərhələsinə yüksəlmək olduğu qeyd edilir.

Yerli media müdafiədə səhvsiz oyunun həlledici amil olacağını xüsusi vurğulayır. Yazılarda qeyd olunur ki, “Zirə” doğma meydanda daha aqressiv futbol nümayiş etdirəcək və “Payde” buna hazır olmalıdır.

Bəzi şərhlərdə “Zirə” cütün favoriti hesab olunsa da, ilk oyundakı nəticədən sonra psixoloji üstünlüyün estonların tərəfində olduğu bildirilir. Yerli mətbuatın fikrincə, “Payde”nin səfərdə vuracağı bir qol bizimkilərin işini xeyli çətinləşdirə bilər.

Ümumilikdə isə Estoniya mediasında nikbin əhval-ruhiyyə hökm sürür. Yerli nəşrlər “Payde”nin klub tarixinin ən böyük avrokubok uğurlarından birinə imza atmaq şansının olduğunu və komandanın bu fürsətdən maksimum yararlanmağa çalışacağını yazırlar.

“Zirə” – “Payde” qarşılaşması Sumqayıtdakı “SOCAR Polymer Arena”da keçiriləcək. Oyunu Xorvatiyadan olan FIFA referisi Patrik Kolariç idarə edəcək. İlk görüş Estoniya təmsilçisinin 1:0 hesablı qələbəsi ilə başa çatıb.

Bu cütün qalibi III təsnifat mərhələsində Andorranın “Santa Koloma” və Avstriyanın “Rapid” (ilk oyun – 1:3) komandaları arasında qalib gələn tərəflə üz-üzə gələcək.