Mundialın finalında Argentina üzərində tarixi qələbə qazanan “Qırmızı furiya” zəfəri qeyd etmək üçün vətənə qayıdır.

Həlledici matçın əlavə vaxtında Argentinanı 1:0 hesabı ilə məğlub edərək dünyanın ən güclüsü adını qazanan İspaniya millisi bazar ertəsi Madriddə təntənəli şəkildə qarşılanacaq. Çempionların şərəfinə təşkil olunacaq proqrama üstüaçıq avtobusla şəhər turu, rəsmi görüşlər və yüz minlərlə azarkeşin iştirakı ilə möhtəşəm şənlik daxildir.

Çempionların rəsmi proqramı saat 15:50-də komandanı gətirən təyyarənin paytaxtın Baraxas hava limanına enişi ilə start götürəcək. Daha sonra, saat 19:30-da İspaniya Kralı VI Felipe qalibləri qəbul edəcək. Ölkə rəhbəri Nyu-York yaxınlığındakı İst-Raterfordda baş tutan final matçını tribunadan canlı izləmişdi. Kral sarayındakı qəbuldan dərhal sonra isə kapitan Rodri və komanda yoldaşları Hökumət Evinə yollanaraq Baş nazir Pedro Sançeslə görüşəcəklər.

Matçı stadiondan izləyən Baş nazir oyundan dərhal sonra X platformasında komandanı təbrik edib: “BİZ DÜNYA ÇEMPİONUYUQ! Milli komandamız sadəcə möhtəşəmdir! Təşəkkürlər, komanda!”

Rəsmi protokoldan dərhal sonra “Qırmızı furiya” xüsusi üstüaçıq avtobusla Madrid küçələrinə çıxaraq çempionluğu azarkeşlərlə birgə qeyd edəcək. Şənliklərin kulminasiya nöqtəsi ənənəvi olaraq paytaxtın simvolik məkanlarından olan Sibeles meydanında olacaq. Meydanda saat 21:00-da start götürəcək möhtəşəm musiqi şousuna futbolçuların saat 00:00 radələrində qatılması planlaşdırılır.

Yığmanın müdafiəçisi Mark Kukurelya tarixi uğuru belə şərh edib: “ABŞ-a konkret məqsədlə gəlmişdik. Təlim-məşq toplanışı və turnir də daxil olmaqla, burada keçirdiyimiz 50 günün hər anından zövq aldıq. İndi isə dincəlmək, xatirələri yada salmaq və ən əsası bu zəfəri doya-doya qeyd etmək vaxtıdır”.

Xatırladaq ki, bu, 2010-cu ildəki ilk zəfərdən sonra İspaniya yığmasının tarixində qazandığı ikinci Dünya Kubokudur.