48 komandanın iştirak edəcəyi dünya çempionatının startına sayılı günlər qalmış, iştirakçı ölkələr arasında ilk rəsmi addımı Bosniya və Herseqovina atdı. Baş məşqçi Sergey Barbarezin rəhbərlik etdiyi komanda, turnirdə mübarizə aparacaq 48 ölkə arasında 26 nəfərlik yekun heyətini açıqlayan ilk yığma oldu.

Bosniya yığmasının heyətində ən diqqətçəkən isim, şübhəsiz ki, 40 yaşlı super ulduz Edin Dzekodur. 2014-cü ildə ölkəsinin debüt etdiyi dünya çempionatında İranla oyunda (3:1) qələbə qoluna imza atan təcrübəli hücumçu, illər sonra yenidən mundialın həyəcanını yaşayacaq.

Komandanın turnir zamanı harada məskunlaşacağı ilə bağlı uzun sürən müzakirələrə də son qoyulub. Torontoda Kanadaya qarşı keçiriləcək ilk qrup oyunundan sonra bosniyalılar ABŞ-ın Yuta ştatına yollanacaqlar. Barbarezin yetirmələri dünya çempionatına hazırlıq prosesini Solt-Leyk-Siti şəhərində yerləşən bazada davam etdirəcəklər.

Bosniya yığmasının heyətində Ermedin Demiroviç, Haris Tabakoviç, Nikola Katiç, Armin Giqoviç və Osman Hadjikiç kimi karyerası İsveçrə futbolu ilə sıx bağlı olan simalar ön plana çıxır. Baş məşqçi Sergey Barbarez sanki heyəti qurarkən “İsveçrə məktəbi”nin təcrübəsinə xüsusi güvənib.

Dünya çempionatına hazırlıq çərçivəsində mayın 23-də Sarayevoda bir araya gələcək komanda, mayın 25-də tam heyətlə məşqlərə start verəcək. Mundialöncəsi əsas sınaqlar isə mayın 29-da Şimali Makedoniya və iyunun 6-da Panama yığmalarına qarşı keçiriləcək.

Bosniya və Herseqovina yığmasını dünya çempionatında kifayət qədər çətin və maraqlı sınaqlar gözləyir. Barbarezin “silahdaşları” mundialın açılışını ev sahibi ölkələrdən biri olan Kanada ilə edəcək. Torontodakı bu çətin sınaqdan dərhal sonra komanda Yutadakı əsas bazasına yollanacaq.

Qrupun taleyini həll edəcək ən kritik döyüş isə iyunun 18-də baş tutacaq. İsveçrə ilə keçiriləcək bu matçın liderlik uğrunda əsas mübarizə olacağı və qrupun qalibini müəyyənləşdirəcəyi proqnozlaşdırılır. Bosniyalılar qrup mərhələsinə iyunun 24-də Qatar yığması ilə keçiriləcək oyunla nöqtə qoyacaqlar.