Portuqaliya mətbuatının yaydığı məlumata görə, Corcina Rodrigez Kriştiano Ronaldo ilə münasibətlərində mühüm hüquqi addım atıb. 32 yaşlı model və iş adamının Ronaldonun üç böyük övladını – 16 yaşlı kiçik Kriştianonun və 9 yaşlı əkizləri Yeva ilə Mateonu rəsmən övladlığa götürdüyü bildirilir.

Bu uşaqlar illərdir Corcinanın həyatının ayrılmaz hissəsidir. O, Ronaldo ilə 2016-cı ildə tanış olanda futbolçunun böyük oğlu Kriştiano 6 yaşında idi və Ronaldo onu tək böyüdürdü. Futbolçunun böyük oğlunun bioloji anasının kimliyi isə indiyədək açıqlanmayıb.

Bir il sonra surroqat ana vasitəsilə Yeva və Mateo dünyaya gəlib. Elə həmin il Corcina Ronaldodan olan ilk qızı Alana Martinanı dünyaya gətirib. Həmin vaxtdan etibarən ailədə uşaqlar arasında “doğma” və “ögey” ayrı-seçkiliyinə yol verilməyib. Corcina onların hər birini öz övladı kimi qəbul edib, doğum günlərində və digər mühüm anlarında yanlarında olub, onları məktəbə aparıb və ailə səyahətlərində iştirak edib.

Ailə 2022-ci ildə daha bir əkiz övlad sevinci yaşamaq istəyərkən ağır faciə ilə üzləşib. Bella Esmeralda sağ dünyaya gəlsə də, onun əkiz qardaşı Anxel doğuş zamanı vəfat edib. Ronaldo bu itkini həyatının ən ağır anlarından biri kimi qiymətləndirib. Corcina isə sosial şəbəkələrdə ailələrini hələ də altı uşaqlı ailə kimi təqdim edir.

Portuqaliya mətbuatının məlumatına əsasən, Corcinanın bu addımı illərdir formalaşan ana-övlad münasibətini hüquqi müstəviyə də daşıyır. Cütlüyün şəxsi həyatla bağlı digər məsələlərdə olduğu kimi, bu qərarı da mediadan uzaq şəkildə qəbul etməyə üstünlük verdiyi bildirilir.