“Bavariya”nın və Almaniya millisinin gənc ulduzu Camal Musiala səhhətində yaranan problemlə bağlı Münhen klubunu təşvişə salıb. 23 yaşlı yarımmüdafiəçi “RB Leypsiq”lə matçdan üç gün sonra, bu dəfə “Haydenhaym”la keçirilən yoldaşlıq görüşündə meydanda huşunu itirib.

Qarşılaşmanın 61-ci dəqiqəsində baş məşqçi Vinsent Kompani İsmael Saibarinin əvəzinə meydana onu meydana daöil edib. 6 dəqiqə sonra Musiala meydanın mərkəzində qəfildən yerə yıxılıb. Hər iki komandanın futbolçuları və həkim heyəti dərhal onun köməyinə tələsib.

Bir neçə dəqiqəlik tibbi müdaxilədən sonra ayağa qalxan almaniyalı futbolçunun müvazinətini saxlamaqda çətinlik çəkdiyi və çaşqın göründüyü diqqətdən yayınmayıb. O, tribunalardakı alqışlar altında meydanı tərk edərək birbaşa soyunub-geyinmə otağına yollanıb.

Bu, Musialanın son 3 gündə meydanda huşunu itirdiyi ikinci haldır. Şənbə günü “RB Leypsiq”ə 3:1 hesabı ilə qalib gəldikləri matçın sonlarına yaxın da oxşar halsızlıq yaşayan futbolçu bazar ertəsi komandanın rəsmi təqdimat mərasimində iştirak etməmiş, fərdi məşqlə kifayətlənmişdi. Bu səbəbdən onun “Haydenhaym”la matçda meydana çıxması gözlənilməz olub.

Baş verənlərdən sonra gənc yarımmüdafiəçi “Instagram” hesabında paylaşım edərək azarkeşləri sakitləşdirməyə çalışıb: “Dəstək mesajlarınıza və diqqətinizə görə hər birinizə minnətdaram. Narahatlığınızı anlayıram və hər şeyi aydınlaşdırmaq istəyirəm. Məndə müalicəyə tam tabe olan müvəqqəti neyroloji funksiya pozuntusu aşkar olunub. Həm ‘Leypsiq’, həm də ‘Haydenhaym’la matçda yaşananlar məhz bu səbəbdən baş verib. Əsas məsələ odur ki, səhhətim üçün başqa bir təhlükə yoxdur. Neyroloqlar və klubun tibbi heyəti ilə sıx əməkdaşlıq edərək bu problemi tam həll edəcəyəm. Ümumilikdə özümü yaxşı hiss edirəm və doğru yoldayam”.

“Bavariya” rəhbərliyi və tibbi heyəti gənc futbolçunun ətraflı müayinələrinin tam nəticəsini gözləyir. Musialanın yaşıl meydanlara nə vaxt qayıdacağı məhz bu analizlərdən sonra rəsmiləşəcək.