Beynəlxalq Cüdo Federasiyası (IJF) Macarıstanın paytaxtı Budapeştdə keçirilən “Böyük Dəbliqə” turnirində 73 kq çəki dərəcəsində qızıl medal qazanan cüdoçumuz Rəşid Məmmədəliyevin möhtəşəm qələbəsinə yazı həsr edib.
73 kq çəki dərəcəsinin həlledici görüşündə Rəşid Məmmədəliyev isveçli Narek Vardanyan üz-üzə gəlib. Final qarşılaşmasında Məmmədəliyev ilk saniyələrdən rəqibə ciddi təzyiq göstərərək Vardanyanı iki cərimə xalı (şido) almağa məcbur edib. Əsas vaxtın bitməsinə 30 saniyə qalmış isə təcrübəli cüdoçumuz həlledici fəndi gerçəkləşdirib: “ko-uçi-qari” fəndi ilə rəqibi təhrik edən Rəşid, dərhal “seoi-otoşi” fəndini tətbiq edərək baxımlı “ippon”la parlaq qələbə qazanıb.
Görüşdən sonra təəssüratlarını bölüşən Məmmədəliyev sevincini gizlətməyib: “Budapeştdə qalib gəldiyim üçün çox şadam. Məşqçi heyətimiz və tibbi personalımızla birlikdə mükəmməl iş ortaya qoyduq. Uşaqlara avtoqraf vermək mənim üçün çox önəmlidir, çünki balaca olarkən özüm də tanınmış cüdoçulardan avtoqraf almaq arzusu ilə yaşayırdım. Arenadakı atmosferi çox bəyəndim. Bu gün ilk dəfə bir yarışda altı döyüş keçirdim və hər mərhələ gərgin mübarizəyə səhnə oldu. Finalda isə isveçli rəqibimin ayaq texnikasının güclü olduğunu bilirdim, buna görə də ona hücum üçün heç bir imkan verməməyə kökləndim. Bakıda keçiriləcək dünya çempionatına gəlincə, zədəsiz və gərgin məşqlərlə hazırlaşmağı hədəfləyirəm. Amma sabah bu qızıl medalı qeyd etməyə vaxtım olacaq”.