Dünya Çempionatının İspaniya və Argentina yığmaları arasında baş tutan möhtəşəm finalı yalnız yaşıl meydandakı gərgin mübarizə ilə deyil, həm də tribunalardakı özəl anlarla yadda qaldı. Çempionluq uğrunda savaçan ulduzları tarixi gecədə ən böyük dəstəkçiləri olan, həyat yoldaşları və sevgililəri tək qoymadı.
Meydandakı 90 dəqiqəlik dramın arxasında isə illərə söykənən sadiqlik, təsadüfi tanışlıqlar və sosial şəbəkələrdən başlayan müasir romantika dayanır.
Lionel Messi və Antonela Rokkuzzo: Uşaqlıq nağılı
Siyahının başında, şübhəsiz ki, futbol dünyasının ən nümunəvi cütlüklərindən olan Lionel Messi və Antonela Rokkuzzo gəlir. Messi gələcək həyat yoldaşı ilə hələ uşaqlıq illərində, dostu Lukas Skalyanın vasitəsilə tanış olub. Özündən bir yaş kiçik həmyerlisi ilə münasibətini 2009-cu ildə ictimailəşdirən argentinalı ulduz, 2017-ci ilin iyununda onunla ailə qurub. Tyaqo, Mateo və Siro adlı üç oğul böyüdən cütlüyün xanımı hazırda dünyanın ən məşhur futbolçu xanımlarından (WAGs) biridir. İnstaqramda 41 milyondan çox izləyicisi olan 38 yaşlı Antonela təkcə ulduz futbolçunun həyat yoldaşı kimi deyil, həm də nüfuzlu biznesqadın, bloqer və xeyriyyəçi kimi tanınır.
Emiliano Martines və Mandinya: Dayanacaqdan Başlayan Romantika
Argentina milli komandasının qapıçısı Emiliano Martines sevgilisi Amanda (“Mandinya”) ilə 2013-cü ildə Londonun avtobus dayanacaqlarının birində tanış olub. İllər sonra təcrübəli qolkiper etiraf edib ki, o vaxt həddindən artıq utancaq olduğu üçün xanıma yaxınlaşıb görüşə dəvət etməyə cəsarəti çatmayıb. Cütlük 2017-ci ilin mayında ailə qurub. 2018-ci ildə oğulları Santyaqo, 2021-ci ildə isə qızları Ava dünyaya gəlib. Daxili dizayner və uşaq brendinin təsisçisi olan Mandinya hazırda İnstaqramda 800 mindən çox izləyiciyə malikdir.
Enzo Fernandes və Valentina Servantes: Yeniyetməlikdən doğan yeni şans
Enzo və Valentina yeniyetmə yaşlarından bir-birini tanıyırlar. Oliviya və Bencamin adlı iki övlad böyüdən cütlüyün münasibətləri həmişə hamar olmayıb – bir müddət ayrılan tərəflər daha sonra münasibətlərinə ikinci şans verərək yenidən bir araya gəliblər. Valentina 3.7 milyon izləyicisi ilə Argentinanın ən populyar mediya simalarından biridir.
Lisandro Martines və Muri Lopes Benites: 14 yaşın sadiqliyi
Cütlük doğma Qualequay şəhərində, cəmi 14 yaşları olarkən tanış olub. 2025-ci ilin martında Avrora adlı qızları dünyaya gələn cütlük xüsusi emosional bağları ilə seçilir. Peşəkar rəqqasə və 350 min izləyicisi olan inflyuenser Muri Lopesin ad günündə Lisandro sosial şəbəkədə bu emosional sözləri paylaşmışdı: “Sənin təbəssümünə, enerjinə, sadəliyinə, xeyirxahlığına, mənə bəxş etdiyin hüzura, məhəbbətinə və hər şeydən öncə böyük qəlbinə vuruldum. Məni seçdiyin üçün, yanımda olduğun üçün təşəkkür edirəm”.
Nikolas Talyafiko və Karo Kalvani: Maldivlərdən Buenos-Ayresə
10 ildən çoxdur birlikdə olan cütlük 2021-ci ildə Maldiv adalarında nişanlanıb. 2022-ci ilin dekabrında, Argentinanın Qətərdəki Zəfərindən dərhal sonra Buenos-Ayresdə dəbdəbəli toy məclisi təşkil ediblər. Karo hazırda 1 milyon izləyicisi olan tanınmış fitnes-bloqer və iş qadınıdır.
Argentina yığmasının digər ulduzlarının da ailə həyatı diqqətdən kənarda qalmır: Şəxsi həyatını mətbuatdan gizli saxlamağa üstünlük verən Kristian Romero və Karen Kavaller cütlüyü Valentino adlı oğul və Luka adlı qız övladı böyüdür. Uzunmüddətli münasibətlərini qoruyub saxlayan Nauel Molina və Barbara Okkiutsi cütlüyünün isə bu ilin yanvar ayında Alleqra adlı qızları dünyaya gəlib.
İspaniya Cəbhəsi: Avropa romantikası və müasir trendlər
Lamin Yamal və İnes Qarsia Santos: Sosial Şəbəkə Romantikası
İspan futbolunun gənc ulduzu Lamin Yamal sevgilisi İnes Qarsia ilə münasibətlərini bu ilin may ayında, “Barselona”nın təşkil etdiyi rəsmi şam yeməyində təsdiqlədi. Şayiələrə son qoyan İnes TikTok hesabında tanışlıq hekayələrini belə bölüşüb:
“Hər kəs məndən ‘Tvitter’dəki kimi nağılvari bir hekayə gözləyirdi: guya onu mağazada görmüşəm, kartım keçməyib və o məni xilas edib… Xeyr, biz sadəcə sosial şəbəkədə tanış olmuşuq və düşündüyünüzdən daha uzun müddətdir ki, birlikdəyik.”
İnes hazırda İnstaqramda 1.5 milyonluq auditoriyaya malikdir.
Dani Olmo və Laura “Abla” Şmitt: Leypsiqdən Kataloniyaya
Dani Olmo almaniyalı bloqer Laura ilə “RB Leypsiq”də çıxış etdiyi illərdə tanış olub. 2024-cü ildə futbolçu “Barselona”ya transfer olunarkən sevgilisi də onunla birgə Kataloniyaya köçüb. Laura (450 min izləyici) çempionat boyunca tribunalardan paylaşdığı fotolarla diqqət mərkəzində olub.
Eymerik Laport və Sara Botello: Qəsrdəki Nağıl
Təcrübəli müdafiəçi peşəkar balerina və keçmiş çirlider Sara Botello ilə evlidir. 2023-cü ilin iyununda qəsrdə baş tutan dəbdəbəli toyla ailə quran cütlüyün iki övladı var. İspaniya milli komandasının digər üzvləri də ailə həyatlarındakı sakit və xoşbəxt anlarla diqqət çəkirlər. 2025-ci ilin sentyabrında bir övlad sahibi olan Pedro Porro və Mariya Urtado cütlüyü, Mariyanın əvvəlki nikahından olan qızını da birgə böyüdürlər. İxtisasca həkim olan Ainoa Larrauri ilə uzunmüddətli münasibətini sürdürən Mikel Oyarsabal turnir matçındakı xüsusi qol sevinci ilə ailəsinə həsr etdiyi duyğulu anlarla yadda qalıb. “Barselona”nın gənc müdafiəçisi Pau Kubarsi isə şəxsi həyatını ciddi şəkildə gizli saxlayır; onun sevgilisi Martina Riera yalnız klubun çempionluq ziyafətində futbolçunun yanında görünüb.