Almaniya yığmasının sabiq futbolçusu və keçmiş baş məşqçisi Berti Foqts Argentina millisinin Dünya Çempionatındakı çıxışını heyranlıqla qarşılayıb. “Rheinische Post” qəzetinə müsahibəsində 79 yaşlı mütəxəssis “tanqoçular”ın oyun tərzını keçmiş Almaniya millisinə bənzədib.

Almaniya futbolunun əfsanəsi cənubamerikalıların mübarizə əzmini xüsusi vurğulayıb: “Argentinalıların oyununa baxanda elə hiss edirəm ki, qarşımda köhnə Almaniya yığması var. Onların, vaxtilə bizim etdiyimiz kimi, hətta ümidsiz görünən vəziyyətlərdə belə təslim olmaması çox xoşuma gəlir. Misirlə qarşılaşmada 0:2 hesablı geri düşsələrdə, sonra oyunda dönüş yaradaraq 3:2 hesablı qələbə qazanmaları alqışa layiqdir. Bu komandada təkcə Lionel Messi deyil, kollektiv olaraq bütün heyət parlayır.”

Oyunçu kimi DÇ-1974-ün, baş məşqçi kimi isə AÇ-1996-nın qalibi olan Foqts, hazırda İngiltərə yığmasını çalışdıran həmyerlisi Tomas Tuxelin də fəaliyyətini yüksək qiymətləndirib. Almaniya millisinin formasını 96 matçda geyinmiş veteran futbolçu xarici mütəxəssis kimi İngiltərə sükanı arxasına keçməyin böyük cəsarət tələb etdiyini bildirib: “İngiltərə mətbuatı öz nəzakəti ilə seçilmədiyi üçün Tuxelin təzyiq və kəskin tənqidlərlə qarşılaşacağı gözlənilən idi. Lakin onun bu vəziyyətdən necə ustalıqla çıxması, məsələn, 1/4 finalda Norveç üzərində qazanılan qələbədən sonra belə öz oyunçularına qarşı tələbkar və tənqidi yanaşmasını qoruması təqdirəlayiqdir”.