Premyer Liqanın 23-cü turunda doğma meydanda “Zirə”ni qəbul edən Gəncənin “Kəpəz” komandası dramatik keçən görüşdən bir xalla ayrılıb (2:2). Matçdan sonra keçirilən mətbuat konfransında gəncəlilərin baş məşqçisi Azər Bağırov oyunun gedişatını və nəticəni dəyərləndirib.

Baş məşqçi ilk növbədə komandanı tək qoymayan azarkeşlərə minnətdarlığını bildirib: “Son dəqiqəyə qədər bizimlə olan, komandaya dəstək verən azarkeşlərimizə təşəkkür edirəm. Unutmaq olmaz ki, həqiqi azarkeş məhz komandanın çətin vaxtlarında bəlli olur. Onların bu enerjisi futbolçularımız üçün çox vacibdir”.

Rəqibin gücünə bələd olduqlarını vurğulayan Bağırov, oyunun gedişatındakı eniş-yoxuşlara toxunub: “Bizi güclü bir rəqibin gözlədiyini bilirdik və komandanı buna uyğun hazırlamışdıq. Təəssüf ki, oyuna pis başladıq. Lakin sonradan toparlanmağı bacardıq və rəqib qapısına iki qol vurduq. Əgər bəzi epizodlarda daha dəqiq oynasaydıq, hesab fərqini artıra və daha böyük uğur qazana bilərdik.

Matçın son dəqiqələrində qələbəni əldən verdiklərini deyən mütəxəssis, bir xalı qazanc yox, itki hesab edir: “Oyunun sonunda qələbəni rəqibə ‘hədiyyə etdik’. Hesab edirəm ki, bu gün biz bir xal qazanmadıq, əksinə, vacib iki xalı itirdik”.