“Real”ın ulduzu Vinisius Juniorun gələcəyi sual altındadır. 26 yaşlı braziliyalı vingerin klubla olan müqaviləsinin başa çatmasına bir il qalmış, “Arsenal” onu yaxından izləməyə başlayıb.

DÇ-2026-da Braziliya millisinin heyətində 5 matçda 4 qol və 1 məhsuldar ötürmə ilə turnirin ən parlaq oyunçularından biri olan Vinisius, Joze Mourinyonun rəhbərlik etdiyi “Real”a qayıdır. Lakin tərəflər arasında yeni müqavilə ilə bağlı danışıqlar hələ də bir nəticə verməyib. 2027-ci ilin iyununda başa çatacaq sözləşmənin yenilənməməsi, Madrid təmsilçisini ulduz oyunçusunu “azad agent” kimi itirmək riski ilə üz-üzə qoyur.

The Athletic” nəşrinin jurnalistləri Devid Ornşteyn və Ceyms MakNikolasın məlumatına görə, “Arsenal” braziliyalı vingeri hücum xəttini gücləndirmək üçün əsas namizədlərdən biri kimi nəzərdən keçirir. Hazırda klublar arasında rəsmi danışıqlar olmasa da, “topçular”ın rəhbərliyi bu transfer ideyasını tam dəstəkləyir.

2018-ci ildən “Kral klubu”nun formasını geyinən Vinisius, “Real”ın heyətində keçirdiyi 375 matçda 128 qol və 100 məhsuldar ötürmə ilə yadda qalıb. Bazar dəyəri 140 milyon avro qiymətləndirilən braziliyalı üçün madridlilər həm oyunçunu itirməmək, həm də növbəti mövsümdə nəzərdə tutulan “loyallıq bonusu”nu ödəməmək üçün qısa zamanda qərar verməlidir. “Arsenal”ın bu marağının yaxın aylarda konkret təklifə çevrilib-çevrilməyəcəyi isə tərəflər arasında gedən yeni müqavilə danışıqlarının yekunundan asılı olacaq.