Cümə günü Almaniya Kubokunda Frankfurt “Ayntraxt”ı “Sankt-Tönis”i 11:0 hesabı ilə darmadağın etsə də, günün əsas diqqətçəkən və müzakirə olunan hadisəsi başqa bir arenada yaşanıb.

“Manheym” (Waldhof) və “Kayzerslautern” komandaları arasında keçirilən kubok matçı kütləvi dava və azarkeş iğtişaşlarına görə əlavə vaxtdan dərhal əvvəl yarımçıq dayandırılıb. Meydandakı gərginliyin tribunalara keçməsi nəticəsində matça polis müdaxilə etməli olub.

Qolsuz bərabərliklə davam edən matçın əsas vaxtının sonlarına yaxın “Kayzerslautern”in futbolçusu Marlon Ritterə qarşı kobudluqdan sonra həm meydanda, həm də ondan kənarda xaos yaranıb. Futbolçular arasında başlayan kütləvi dava tezliklə azarkeşlərə də sirayət edib. Baş tribunadan “Kayzerslautern”in ehtiyat oyunçular skamyasına bayraqlar və bannerlər atılıb.

Daha sonra azarkeşlər pirotexniki vasitələr (fayerlər) yandıraraq və reklam lövhələrini qıraraq meydana daxil olublar. Yaranmış təhlükəli vəziyyət səbəbindən futbolçular və matçın rəsmiləri dərhal paltardəyişmə otağına sığınmaq məcburiyyətində qalıblar.

Hakimin ümumilikdə 8 sarı vərəqə göstərdiyi gərgin matçda asayişi bərpa etmək üçün əraziyə atlı polis dəstələri yeridilib. Meydanı mühasirəyə alan hüquq-mühafizə orqanları “Manheym”in azarkeş sektorunun önündəki qarşıdurmaya müdaxilə edərək bir neçə xuliqanı ərazidən uzaqlaşdırıb. Bütün bu hadisələr fasiləsiz atılan fişəng və petardaların müşayiəti altında baş verib.

Almaniya mətbuatının məlumatına görə, hər iki klub rəsmilərinin öz azarkeş qrupları ilə danışıqlar apararaq vəziyyəti sakitləşdirməsindən sonra oyunu davam etdirmək mümkün olub. Fasilədən sonra bərpa edilən matçın yekununda 1:0 hesabı ilə qələbə qazanan “Kayzerslautern” növbəti mərhələyə vəsiqəni təmin edib.