Avropanın ikinci dərəcəli klub turniri olan Avropa Liqasında 1/8 final mərhələsinin cavab oyunlarına start verilib. Dünən gecə Portuqaliyada yaşanan “Braqa” möcüzəsindən sonra bu gün futbolsevərləri daha 7 gərgin qarşılaşma gözləyir.
Mərhələnin açılış oyununda Portuqaliyanın “Braqa” klubu Macarıstan təmsilçisi “Ferentsvaroş”u qəbul etdi. Səfərdəki ilk görüşdə 0:2 hesabı ilə məğlub olan portuqaliyalılar öz meydanlarında əsl xarakter nümayiş etdiriblər. Rəqib qapısından 4 cavabsız top keçirən “Braqa”, adını rəsmən 1/4 finala yazdıran ilk komanda olub.
Bu gün keçiriləcək 7 qarşılaşma ilə növbəti mərhələnin bütün iştirakçıları bəlli olacaq. Proqram kifayət qədər zəngindir və demək olar ki, bütün cütlüklərdə intriqa sona qədər davam edir.
Axşamın ilk seansında üç qarşılaşma baş tutacaq. İspaniyadakı ilk oyundan 1:1 hesablı bərabərliklə dönən “Lion”, öz meydanında “Selta”nı sınağa çəkəcək. Fransızlar doğma divarlar arasında üstünlüyü ələ almağa çalışsa da, ispanların sürətli hücum xətti hər an sürpriz edə bilər.
Danimarkada isə “Midtyulland” İngiltərə təmsilçisi “Nottingem Forest”i qəbul edir. İlk oyunda 1:0 hesablı qələbə qazanan danimarkalılar bu üstünlüyü qoruyub növbəti mərhələyə keçmək niyyətindədir. Digər oyunda isə “Frayburq” doğma meydanda Belçika “Genk”i (ilk oyun 0:1) qarşısında revanş almağa çalışacaq.
Gecənin son seansında futbol dünyasının diqqəti Romada olacaq. “Roma” və “Bolonya” arasındakı İtaliya derbisinin ilk oyununda qalib müəyyənləşməmişdi (1:1). “Olimpiko” stadionunda keçiriləcək cavab qarşılaşması gecənin ən prinsipial matçı hesab olunur.
İngiltərənin turnirdəki əsas favoritlərindən biri olan “Aston Villa” isə Fransada qazandığı 1:0-lıq üstünlüklə “Lill”i qəbul edəcək. Unai Emerinin yetirmələri evdə işi şansa buraxmaq istəmir. Eyni saatda həmçinin Portuqaliyada “Portu” – “Ştutqart” (ilk oyun 2:1) və İspaniyada “Betis” – “Panatinaikos” (ilk oyun 0:1) qarşılaşmaları baş tutacaq.
21:45 Lion (Fransa) – Selta (İspaniya) CBC Sport
21:45 Midtyulland (Danimarka) – Nottingem Forest (İngiltərə)
21:45 Frayburq (Almaniya) – Genk (Belçika)
00:00 Aston Villa (İngiltərə) – Lill (Fransa)
00:00 Betis (İspaniya) – Panatinaikos
00:00 Portu (Portuqaliya) – Ştutqart (Almaniya) CBC Sport
00:00 Roma (İtaliya) – Bolonya (İtaliya)